പാലക്കാട്: യൂത്ത് കോണ്‍ഗ്രസിലെ കൂട്ട രാജിക്ക് പിന്നാലെ യൂത്ത് കോണ്‍ഗ്രസ് സംസ്ഥാന അധ്യക്ഷന്‍ ഷാഫി പറമ്പിലിനെതിരെ പാലക്കാട് ജില്ലയിലെ വിവിധ ഇടങ്ങളില്‍ പോസ്റ്ററുകള്‍. ഷാഫി പറമ്പില്‍ എംഎല്‍എയ്ക്കും പാലക്കാട് യൂത്ത് കോണ്‍ഗ്രസ് ജില്ലാ പ്രസിഡന്റ് ഫിറോസ് ബാബുവിനും എതിരെയാണ് പോസ്റ്ററുകള്‍ പ്രത്യക്ഷപ്പെട്ടത്.
പാലക്കാട് യൂത്ത് കോണ്‍ഗ്രസില്‍ ഷാഫി പറമ്പിലിന്റെയും ഫിറോസ് ബാബുവിന്റെയും ഏകാധിപത്യം അവസാനിപ്പിക്കുക മതം പരിചയാക്കി വ്യക്തിഗത വളര്‍ച്ച നേടി പ്രസ്ഥാനത്തെ മുരടിപ്പിക്കുന്ന ഫാസിസം പാര്‍ട്ടിക്ക് നാശം തുടങ്ങിയ കാര്യങ്ങളാണ് പോസ്റ്ററില്‍ ഉള്‍പ്പെടുത്തിയിട്ടുള്ളത്. സംസ്ഥാന കമ്മിറ്റിയുടെ നിര്‍ദേശ പ്രകാരം മണ്ഡലം കമ്മിറ്റികള്‍ പിരിച്ചുവിട്ട നടപടിയില്‍ പ്രതിഷേധിച്ച് ജില്ലയിൽ യൂത്ത് കോൺഗ്രസ് പ്രവർത്തകർ കൂട്ടമായി രാജി വച്ചിരുന്നു.
