ജെറുസലാം : ഇസ്രയേൽ-ഹമാസ് ഏറ്റുമുട്ടലിൽ കൊല്ലപ്പെട്ടവരുടെ എണ്ണം ആയിരം കടന്നു. ശനിയാഴ്‌ച ഹമാസ് ഭീകരർ ഗാസയിൽ നിന്ന് ഇസ്രയേലിലേക്ക് അപ്രതീക്ഷിതമായി 3,000 റോക്കറ്റുകൾ വിക്ഷേപിച്ചതിന് ശേഷമാണ് മേഖലയിൽ യുദ്ധസമാന സാഹചര്യം പൊട്ടിപ്പുറപ്പെട്ടത്. ഇതിന് പകരമായി ഇസ്രയേൽ സേന ഗാസയിലേക്ക് പ്രത്യാക്രമണം കൂടി ആരംഭിക്കുകയും ചെയ്‌തു. നിരവധി സാധാരണക്കാരെയാണ് ഹമാസ് ഭീകരർ തട്ടികൊണ്ട് പോയി കൊലപ്പെടുത്തിയത്.
കാണാതായ തങ്ങളുടെ കുടുംബാംഗങ്ങളെക്കുറിച്ചുള്ള വിവരങ്ങൾ തേടി നൂറുകണക്കിന് ഇസ്രയേലികൾ ഞായറാഴ്‌ച സെൻട്രൽ പോലീസ് സ്‌റ്റേഷനിൽ ഒത്തുകൂടി. 100ലധികം പേരെ ഹമാസ് ഭീകരർ പിടികൂടി ഗാസയിൽ ബന്ദികളാക്കിയതായി ഇസ്രയേൽ സർക്കാർ അറിയിച്ചു. എന്നാൽ കാണാതായ ആളുകളുടെ കൃത്യമായ എണ്ണം ഇപ്പോഴും അജ്ഞാതമാണ്.
ഇസ്രയേൽ സൈന്യവും ഹമാസും തമ്മിലുള്ള ഏറ്റുമുട്ടലിന്റെ രണ്ടാം ദിവസം രാജ്യത്തിന്റെ വിവിധ ഭാഗങ്ങളിലേക്ക് വ്യാപിച്ചു. രാജ്യത്തിനെതിരായ ഏറ്റവും മാരകമായ ആക്രമണത്തിന് ശേഷം ഇസ്രയേലിൽ സൈനികർ ഉൾപ്പെടെ 700ഓളം പേർ കൊല്ലപ്പെടുകയും 1,900 ലധികം പേർക്ക് പരിക്കേൽക്കുകയും ചെയ്‌തു. ഗാസ മുനമ്പിൽ, ഇസ്രായേലിന്റെ പ്രത്യാക്രമണത്തെത്തുടർന്ന് 413-ലധികം മരണങ്ങളും ഏകദേശം 2,300 പേർക്ക് പരിക്കേൽക്കുകയും ചെയ്‌തു. ഇതോടെ മൊത്തം മരണങ്ങൾ 1,000 കവിഞ്ഞു.
അതേസമയം, വടക്കൻ ഇസ്രായേലിൽ, ലെബനീസ് ഇസ്ലാമിസ്‌റ്റ് ഗ്രൂപ്പായ ഹിസ്ബുള്ള ഞായറാഴ്‌ച ഇസ്രായേലി പോസ്‌റ്റുകൾ ലക്ഷ്യമിട്ട് മോർട്ടാർ ഷെല്ലാക്രമണം നടത്തി. ഇസ്രായേൽ സൈന്യം ലെബനനിലേക്ക് പീരങ്കി ആക്രമണത്തിലൂടെ മറുപടി നൽകുകയും അതിർത്തിക്കടുത്തുള്ള ഹിസ്ബുള്ള പോസ്‌റ്റിൽ ഡ്രോൺ ആക്രമണം നടത്തുകയും ചെയ്‌തു. മേഖലയിൽ സംഘർഷാവസ്ഥ തുടരുകയാണ്.
ഈജിപ്‌തിലെ അലക്‌സാണ്ട്രിയ നഗരത്തിലെ ഒരു പോലീസ് ഉദ്യോഗസ്ഥൻ ഇസ്രായേലി വിനോദസഞ്ചാരികൾക്ക് നേരെ വെടിയുതിർത്തു. ആക്രമണത്തിൽ രണ്ട് ഇസ്രായേലികളും ഒരു ഈജിപ്ഷ്യൻ ഗൈഡും കൊല്ലപ്പെട്ടുവെന്നാണ് റിപ്പോർട്ടുകൾ. ചരിത്രപ്രസിദ്ധമായ പോംപേസ് പില്ലർ സൈറ്റിൽ നടന്ന ആക്രമണത്തിൽ മറ്റൊരാൾക്ക് കൂടി പരിക്കേറ്റതായി പ്രാദേശിക മാധ്യമങ്ങളിൽ നിന്നുള്ള റിപ്പോർട്ടുകൾ സൂചിപ്പിക്കുന്നു. സുരക്ഷാ സേന പ്രദേശം വളയുകയും അക്രമിയെന്ന് സംശയിക്കുന്നയാളെ പിടികൂടുകയും ചെയ്‌തു.
11 പൗരന്മാരെ ഹമാസ് ഭീകരർ പിടികൂടിയതായി തായ്‌ലൻഡ് വിദേശകാര്യ മന്ത്രാലയം ഞായറാഴ്‌ച അറിയിച്ചു. ടൈംസ് ഓഫ് ഇസ്രയേലിൽ നിന്നുള്ള റിപ്പോർട്ടുകൾ പ്രകാരം അവരെ ഗാസയിലേക്ക് കൊണ്ടുപോകാൻ സാധ്യതയുണ്ടെന്ന് സൂചനയുണ്ട്. “അവർ നിരപരാധികളാണ്, സംഘർഷവുമായി യാതൊരു ബന്ധവുമില്ല,” തായ് പ്രധാനമന്ത്രി ശ്രേത്ത തവിസിൻ പറഞ്ഞതായി ബാങ്കോക്ക് പോസ്‌റ്റ് റിപ്പോർട്ട് ചെയ്‌തു.
ഗാസയ്ക്ക് സമീപമുള്ള ഒരു സംഗീതോത്സവത്തിൽ പലസ്‌തീൻ ഇസ്ലാമിസ്‌റ്റ് ഗ്രൂപ്പായ ഹമാസ് നടത്തിയ ആക്രമണത്തിന് ശേഷം ഒരു ബ്രിട്ടീഷ് പൗരനെ കാണാതായതായി യുകെയിലെ ഇസ്രയേൽ എംബസി അറിയിച്ചു.
ഇസ്രയേലിനെതിരായ ഹമാസ് ആക്രമണത്തിൽ മൂന്ന് യുഎസ് പൗരന്മാർ കൊല്ലപ്പെട്ടതായി വാർത്താ സംഘടനയായ സിഎൻഎൻ റിപ്പോർട്ട് ചെയ്‌തു. ഒരു ഫ്രഞ്ച് പൗരന്റെ മരണം ഫ്രാൻസിന്റെ വിദേശകാര്യ മന്ത്രാലയം സ്ഥിരീകരിച്ചു. യുക്രൈൻ വിദേശകാര്യ മന്ത്രാലയം തങ്ങളുടെ രണ്ട് പൗരന്മാർ ഇസ്രായേലിൽ മരിച്ചുവെന്ന് അറിയിച്ചതായും വാർത്താ ഏജൻസിയായ എഎഫ്‌പി റിപ്പോർട്ട് ചെയ്‌തു.
ഹമാസിന്റെ ആക്രമണത്തിൽ 10 നേപ്പാളി വിദ്യാർത്ഥികൾ കൊല്ലപ്പെട്ടതായി ഇസ്രായേലിലെ നേപ്പാൾ എംബസിയിലെ ഉദ്യോഗസ്ഥൻ വാർത്താ ഏജൻസിയായ എഎൻഐയോട് പറഞ്ഞു.
ഇസ്രായേൽ പ്രതിരോധ സേനയെ പിന്തുണയ്ക്കാൻ ആയുധങ്ങൾ ഉൾപ്പെടെയുള്ള അധിക ഉപകരണങ്ങളും മറ്റും അയയ്ക്കുമെന്ന് യുഎസ് സർക്കാർ ഞായറാഴ്‌ച അറിയിച്ചു. കൂടുതൽ സഹായം നൽകുമെന്ന് പ്രസിഡന്റ് ജോ ബൈഡൻ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന് ഉറപ്പ് നൽകി. കൂടാതെ, ഹമാസിന്റെ ആക്രമണത്തിൽ ബ്രിട്ടീഷ് പ്രധാനമന്ത്രി ഋഷി സുനാക്ക് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന് ശക്തമായ പിന്തുണ അറിയിച്ചു.
