കൊച്ചി: കേരളത്തിന് ആദ്യമായി സന്തോഷ് ട്രോഫി നേടി തന്ന ടീമിലെ ടി.എ ജാഫര്‍ അന്തരിച്ചു. 1973ല്‍ ആദ്യമായി സന്തോഷ് ട്രോഫി നേടിയ കേരള ടീമിന്‍റെ വൈസ് ക്യാപ്റ്റനും 92ലും 93ലും ചാമ്ബ്യന്‍മാരായ കേരളത്തിന്‍റെ പരിശീലകനുമായിരുന്നു ടി.എ ജാഫര്‍.ഫോര്‍ട്ട് കൊച്ചിയിലെ യംഗ്സ്റ്റേഴ്‌സ് സ്‌പോര്‍ട്‌സ് ക്ലബില്‍ കളിച്ചായിരുന്നു ടി.എ ജാഫറിന്‍റെ ഫുട്‌ബോള്‍ കരിയര്‍ ആരംഭിക്കുന്നത്. 1963ലാണ് ആദ്യമായി ടീമില്‍ കളിച്ചത്. അവിടെനിന്ന് എഫ്‌എസിടിക്ക് വേണ്ടിയും പിന്നീട് ദീര്‍ഘകാലം പ്രീമിയറിന് വേണ്ടിയും ബൂട്ടണിഞ്ഞു.
1969-ലാണ് കേരള ടീമിനായി ആദ്യമായി ജേഴ്‌സിയണിഞ്ഞ് കളത്തിലിറങ്ങിയത്. 1975 വരെ കേരളത്തിനായി കളിച്ചു. ഇതിനിടെ 73ലെ സന്തോഷ് ട്രോഫി കിരീട വിജയത്തിലും ജാഫറിന്‍റെ കൈയ്യൊപ്പുണ്ടായി.1984 വരെ പ്രീമിയറിലും കളിച്ചു. പിന്നീട് തന്‍റെ 44-ാം വയസില്‍ സ്‌പോര്‍ട്‌സ് കൗണ്‍സിലില്‍ ചേര്‍ന്നതോടെ ജാഫര്‍ പൂര്‍ണമായും പരിശീലനത്തിലേക്ക് തിരിയുകയായിരുന്നു.
