ഉപയോക്താക്കളുടെ വിവരങ്ങള്‍ക്ക് കൂടുതല്‍ സുരക്ഷ ഉറപ്പാക്കുന്ന അപ്‌ഡേഷനുമായി വാട്‌സ്ആപ്പ്. ചാറ്റ് ബാക്കപ്പുകള്‍ക്ക് എന്‍ഡ്- ടു- എന്‍ഡ് എന്‍ക്രിപ്ഷന്റെ അധിക പരിരക്ഷ ഉറപ്പാക്കുന്ന പുതിയ ഫീച്ചറാണ് ടെക് ഭീമന്‍മാര്‍ അവതരിപ്പിച്ചിരിക്കുന്നത്.
ഐ.ഒ.എസ്, ആന്‍ഡ്രോയ്ഡ് പ്ലാറ്റ്‌ഫോമുകളില്‍ വാട്‌സ്ആപ്പ് ഉപയോഗിക്കുന്നവര്‍ക്ക് പുതിയ ഫീച്ചര്‍ ലഭ്യമായിത്തുടങ്ങും. ബഗുകളൊന്നുമില്ലെന്ന് ഉറപ്പു വരുത്തുന്നതിനായി കമ്പനി ശ്രമിക്കുന്നതിനാല്‍ ആദ്യ ആഴ്ചകളില്‍ ചാറ്റ് ബാക്കപ്പ് എന്‍ക്രിപ്ഷന്‍ പതുക്കെ മാത്രമേ ലഭ്യമാകൂ.
തുടര്‍ന്നുള്ള ആഴ്ചകളില്‍ ഇത് വേഗത്തിലാകും. കഴിഞ്ഞ മാസം ഫേസ്ബുക്ക് സി.ഇ.ഒ മാര്‍ക്ക് സുക്കര്‍ബര്‍ഗ് ഈ സുരക്ഷ ഫീച്ചറിനെ കുറിച്ച് സാമൂഹ്യ മാധ്യമങ്ങളിലൂടെ സൂചന നല്‍കിയിരുന്നു.
എന്താണ് ചാറ്റ് ബാക്കപ്പ് എന്‍ക്രിപ്ഷന്‍ എങ്ങനെ സജ്ജമാക്കാം:
വാട്‌സ്ആപ്പ് സന്ദേശങ്ങള്‍ നിലവില്‍ എന്‍ഡ്-ടു- എന്‍ഡ് എന്‍ക്രിപ്റ്റഡ് ആണ്. അതായത്, സന്ദേശം അയക്കുന്നയാളും സ്വീകരിക്കുന്നയാളുമല്ലാതെ മൂന്നാമതൊരാള്‍ അത് കാണുന്നില്ലെന്നാണ് കമ്പനി അവകാശപ്പെടുന്നത്. സന്ദേശങ്ങര്‍ അയക്കുകയും സ്വീകരിക്കുകയും ചെയ്യുന്ന ഉപകരണങ്ങളിലല്ലാതെ വാട്‌സ്ആപ്പിന്റെ സെര്‍വറില്‍ പോലും സന്ദേശങ്ങള്‍ സൂക്ഷിക്കുന്നില്ല.
എന്നാല്‍, ചാറ്റ് ക്ലൗഡിലേക്ക് അപ്‌ലോഡ് ചെയ്യുമ്പോള്‍ അവ എന്‍ക്രിപ്റ്റഡായിരിക്കില്ല. അതായത്, വ്യത്യസ്ത ആപ്പുകളിലും സേവനങ്ങളിലും ഒരേ പാസ്വേഡ് ഉപയോഗിക്കുന്ന ഉപയോക്താക്കള്‍ ഹാക്കിങ്ങിന് ഇരയാകാന്‍ സാധ്യത കൂടുതലാണ്.
വാട്‌സ്ആപ്പ് ബാക്കപ്പുകള്‍ ക്ലൗഡില്‍ സംരക്ഷിക്കാനും അനധികൃതമായി മറ്റുള്ളവര്‍ പ്രവേശിക്കുന്നത് തടയാനും സഹായിക്കുന്നതാണ് പുതിയ സവിശേഷത. പാസ്‌വേഡോ 64 അക്ക എന്‍ക്രിപ്ഷന്‍ കീയോ ഉപയോഗിച്ച് എന്‍ക്രിപ്റ്റ് ചെയ്തിരിക്കുന്നതിനാല്‍ നമ്മുടെ ഡേറ്റക്ക് കൂടുതല്‍ സുരക്ഷ ഉറപ്പാക്കാനാകും. ഇതോടെ വാട്‌സ്ആപ്പ് ബാക്കപ്പുകള്‍ നിങ്ങള്‍ക്ക് മാത്രമാകും കൈകാര്യം ചെയ്യാനാകുക. എന്‍ക്രിപ്ഷന്‍ കീ ഉപയോഗിക്കാതെ ബാക്കപ്പ് അണ്‍ലോക്ക് ചെയ്യാന്‍ സാധിക്കില്ല.
വാട്‌സ്ആപ്പ് സെറ്റിങ്സ്> ചാറ്റുകള്‍> ചാറ്റ് ബാക്കപ്പ്> എന്‍ഡ്-ടു-എന്‍ഡ് എന്‍ക്രിപ്റ്റഡ് ബാക്കപ്പ് എന്നിങ്ങനെ സന്ദര്‍ശിച്ചാല്‍ നിങ്ങളുടെ വാട്ട്സ്ആപ്പ് അക്കൗണ്ടില്‍ ഈ ഫീച്ചര്‍ പ്രവര്‍ത്തനക്ഷമമാക്കിയിട്ടുണ്ടോയെന്ന് പരിശോധിക്കാം. ഉപയോക്താക്കള്‍ക്ക് അവരുടെ എന്‍ഡ്-ടു-എന്‍ഡ് എന്‍ക്രിപ്റ്റ് ചെയ്ത ബാക്കപ്പിനായി ഒരു പാസ്വേഡ് അല്ലെങ്കില്‍ 64 അക്ക എന്‍ക്രിപ്ഷന്‍ കീ സൃഷ്ടിക്കാന്‍ കഴിയും. ലോകത്ത് മറ്റൊരു മെസേജിങ് സര്‍വീസും ഇത്തരത്തില്‍ ഒരു സൗകര്യം നല്‍കുന്നില്ലെന്നാണ് വാട്‌സ്ആപ്പിന്റെ അവകാശവാദം.
