ഇറ്റാനഗര്‍: സൈനിക ട്രക്ക് മലയിടുക്കിലേക്ക് മറിഞ്ഞ് മൂന്ന് സൈനികര്‍ കൊല്ലപ്പെട്ടു. അരുണാചല്‍ പ്രദേശിലാണ് സംഭവം. സൈനികര്‍ സഞ്ചരിച്ച വാഹനം റോഡില്‍ നിന്ന് തെന്നിമാറി മലയിടുക്കിലേക്ക് വീഴുകയായിരുന്നു. ഹവില്‍ദാര്‍ നഖത് സിങ് , നായിക് മുകേഷ് കുമാര്‍, ഗ്രനേഡിയര്‍ ആശിഷ് കുമാര്‍ എന്നിവരാണ് അപകടത്തില്‍ മരണപ്പെട്ടത്.
ചൊവ്വാഴ്ച രാവിലെ ആറ് മണിയോടെ അപ്പര്‍ സുബന്‍സിരി ജില്ലയിലെ ടാപി ഗ്രാമത്തിന് സമീപം ട്രാന്‍സ് അരുണാചല്‍ ഹൈവേയിലാണ് അപകടമുണ്ടായത്. ഡാപോരിജോയില്‍ നിന്ന് ലെപാരഡ ജില്ലയിലെ ബസാറിലേക്ക് പോകുകയായിരുന്ന സൈനിക ട്രക്കാണ് അപകടത്തില്‍പ്പെട്ടത്. നിരവധി പേര്‍ക്ക് അപകടത്തില്‍ പരിക്കേറ്റു. പ്രദേശവാസികളുടെ സഹായത്തോടയാണ് രക്ഷാപ്രവര്‍ത്തനം നടത്തിയത്. പരിക്കേറ്റവരെ ആശുപത്രിയില്‍ പ്രവേശിപ്പിച്ചു.
ഇന്ത്യന്‍ ആര്‍മി ഈസ്റ്റേണ്‍ കമാന്‍ഡ് ഓഫീസര്‍ ലഫ്റ്റനന്റ് ജനറല്‍ ആര്‍സി തിവാരിയടക്കം സൈനികരുടെ മരണത്തില്‍ അനുശോചനം രേഖപ്പെടുത്തി. രാഷ്ട്രത്തിനായുള്ള അവരുടെ സേവനവും പരമോന്നത ത്യാഗവും ഏറ്റവും ആദരവോടെ സ്മരിക്കപ്പെടുമെന്ന് മുഖ്യമന്ത്രി പേമ ഖണ്ഡു പറഞ്ഞു
