തിരുവനന്തപുരം: ലോകായുക്തയില്‍ മുഖ്യമന്ത്രിക്കും സര്‍ക്കാരിനും താല്‍ക്കാലിക ആശ്വാസം. മുഖ്യമന്ത്രിയുടെ ദുരിതാശ്വാസ നിധി വക മാറ്റിയ കേസില്‍ ലോകായുക്തയില്‍ ഭിന്നവിധി. ജസ്റ്റിസ് സിറിയക് ജോസഫ് പരാതിയെ അനുകുലിച്ചപ്പോള്‍ ജസ്റ്റിസ് ഹാറുണ്‍ റഷീദ് പരാതിയെ എതിര്‍ത്തു. ഇതോടെയാണ് അന്തിമ വിധി ഫുള്‍ ബെഞ്ചിന് വിടാന്‍ തീരുമാനമായത്. ജസ്റ്റിസ് ബാബു മാത്യു പി ജോസഫ് കൂടി ഉള്‍പ്പെട്ടതാണ് ഫുള്‍ ബെഞ്ച്. ഇതോടെ കേസില്‍ വിധി നീളും എന്നുറപ്പായി.
മന്ത്രിസഭാ തീരുമാനങ്ങള്‍ ലോകായുക്തക്ക് പരിശോധിക്കാമോ എന്നത് സംബന്ധിച്ചായിരുന്നു അഭിപ്രായ ഭിന്നത. അഭിപ്രായ ഭിന്നതയുണ്ടായ സാഹചര്യത്തില്‍ കേസ് ഫുള്‍ബെഞ്ച് പരിശോധിക്കട്ടെ എന്ന് വിധിയില്‍ പറയുന്നു. കേസ് പരിഗണിക്കേണ്ട തീയതി ലോകായുക്തക്ക് തീരുമാനിക്കുമെന്നും വിധി പ്രസ്താവത്തില്‍ വ്യക്തമാക്കിയിട്ടുണ്ട്. ഫുള്‍ബെഞ്ച് വീണ്ടും വാദം കേള്‍ക്കും.
മുഖ്യമന്ത്രിയുടെ ദുരിതാശ്വാസ നിധിയിലെ ഫണ്ട് വക മാറ്റിയത് സ്വജനപക്ഷപാതമാണെന്ന് ആരോപിച്ച് കേരള സര്‍വകലാശാല മുന്‍ സിന്‍ഡിക്കേറ്റ് അംഗം ആര്‍ എസ് ശശികുമാര്‍ സമര്‍പ്പിച്ച ഹര്‍ജിയിലാണ് നടപടി. വാദം പൂര്‍ത്തിയാക്കിയിട്ടും വിധി വൈകിയ സാഹചര്യത്തില്‍ പരാതിക്കാരന്‍ ഹൈക്കോടതിയെ സമീപിച്ചതിന് പിന്നാലെയാണ് കേസ് വീണ്ടും പരിഗണിച്ചത്. പരേതരായ ചെങ്ങന്നൂര്‍ എംഎല്‍എ രാമചന്ദ്രന്‍ നായര്‍, എന്‍സിപി നേതാവ് ഉഴവൂര്‍ വിജയന്‍ തുടങ്ങിയവരുടെ കുടുംബത്തിന് ദുരിതാശ്വാസ നിധിയില്‍ നിന്നും വഴിവിട്ട് സഹായം നല്‍കിയെന്ന് ചൂണ്ടിക്കാട്ടിയായിരുന്നു ഹര്‍ജി.
