കൊച്ചി: മുന്‍ എംപി ജോയ്‌സ് ജോര്‍ജ്ജിന്റെ പിഎ സതീഷിനെ സ്റ്റാഫാക്കിയ നടപടി വിവാദമായതോടെ വിശദീകരണവുമായി ഹൈബി ഈഡന്‍ എംപിയെത്തി. എംപിക്കെതിരെ സോഷ്യല്‍ മീഡിയയില്‍ കോണ്‍ഗ്രസ് യൂത്ത് കോണ്‍ഗ്രസ് പൊങ്കാല ശക്തമായതോടെയാണ് ഉന്നതങ്ങളിലെ ഇടപെടലില്‍ നടന്ന ജീവനക്കാരന്റെ നിയമനം ഒഴിവാക്കാന്‍ നടപടി തുടങ്ങിയതായി എംപിയുടെ വിശദീകരണ കുറിപ്പ് സോഷ്യല്‍മീഡിയ വഴി എത്തിയത്.
നയപരമായ തീരുമാനങ്ങള്‍ എടുക്കുന്നതില്‍ യാതൊരു പങ്കുമില്ലാത്ത ക്ലറിക്കല്‍ സഹായിയുടെ തസ്തിക ആയതിനാലാണ് സതീഷിനെ നിയമിച്ചതെന്നാണ് എംപി പറയുന്നത്. പ്രമുഖ പുരോഹിതന്റെ ഇടപെടലിലാണ് ഹൈബിക്ക് സ്റ്റാഫായി മുന്‍ ഇടുക്കി എംപി ജോയ്‌സ് ജോര്‍ജ്ജിന്റെ സ്റ്റാഫിലുണ്ടായിരുന്ന സതീശ് എത്തിയതെന്നായിരുന്നു നേരത്തെ കോണ്‍ഗ്രസ് – യൂത്ത് കോണ്‍ഗ്രസ് ആരോപണം. ഇപ്പോള്‍ സോഷ്യല്‍ മീഡിയയില്‍ നടക്കുന്ന പ്രചാരണങ്ങള്‍ ഏറെ വേദനാജനകമാണെന്നും ഇതിന്റെ വസ്തുതകള്‍ വ്യക്തമായി മനസിലാക്കാതെ തേജോവധം ചെയ്യുകയാണ് ചിലരെന്നും എംപി പറയുന്നു
ഫെയ്‌സ് ബുക്ക് പോസ്റ്റിങ്ങനെ:
ഡല്‍ഹിയിലെ സ്റ്റാഫ് നിയമനവുമായി ബന്ധപ്പെട്ട് സോഷ്യല്‍ മീഡിയയില്‍ നടക്കുന്ന സംവാദത്തില്‍ എന്റെ പ്രതികരണം.
അപ്രതീക്ഷിതമായിട്ടാണ് കോണ്‍ഗ്രസ് പ്രസ്ഥാനം ലോക് സഭ തെരെഞ്ഞെടുപ്പില്‍ മത്സരിക്കുക എന്ന ദൗത്യം എന്നെ ഏല്‍പ്പിക്കുന്നത്. നിങ്ങളോരോരുത്തരുടേയും നിസ്വാര്‍ത്ഥമായ പരിശ്രമങ്ങളുടെ ഫലമായി വലിയ ഭൂരിപക്ഷത്തോടെയാണ് ഞാന്‍ ലോക് സഭയിലെത്തുന്നത്. നിങ്ങള്‍ എന്നില്‍ അര്‍പ്പിച്ച പ്രതീക്ഷകള്‍ നില നിര്‍ത്തുക എന്നത് തന്നെയായിരുന്നു എന്റെ മുന്നിലുള്ള ഏറ്റവും വലിയ ഉത്തരവാദിത്വം.
ഡല്‍ഹിയില്‍, ലോക്‌സഭയുമായി ബന്ധപ്പെട്ട ക്ലറിക്കല്‍ ആവശ്യങ്ങളില്‍ സഹായിക്കാന്‍ ഒരു സ്റ്റാഫിനെ ആവശ്യമായിരുന്നു. ഈ സമയത്താണ് സതീഷ് എന്റെ അടുത്തെത്തുന്നത്. സതീഷുമായി സംസാരിച്ചതില്‍ നിന്നും ഇത്തരം കാര്യങ്ങളില്‍ പ്രവൃത്തി പരിചയമുള്ള ഒരാളെന്നാണ് മനസിലാക്കാന്‍ സാധിച്ചത്. നയപരമായ തീരുമാനങ്ങള്‍ എടുക്കുന്നതില്‍ യാതൊരു പങ്കുമില്ലാത്ത ക്ലറിക്കല്‍ സഹായിയുടെ തസ്തിക ആയതിനാല്‍ സതീഷിനെ നിയമിക്കുകയുണ്ടായി. വളരെ കാര്യക്ഷമമായ ഒരു ഓഫീസ് എന്നത് മാത്രമായിരുന്നു എന്റെ ലക്ഷ്യം.
ഒരു കെ.എസ.യു പ്രവര്‍ത്തകനായി ഏറ്റവും താഴെ തട്ടില്‍ നിന്നും പൊതു പ്രവര്‍ത്തന ജീവിതം ആരംഭിച്ച ഞാന്‍ എന്നും കോണ്‍ഗ്രസ് പ്രസ്ഥാനത്തിന്റെ കീഴില്‍ അച്ചടക്കമുള്ള പാര്‍ട്ടി പ്രവര്‍ത്തകനായി തന്നെയാണ് നിലനിന്നിട്ടുള്ളത്. പല ഘട്ടങ്ങളിലായി എന്റെ പൊതു പ്രവര്‍ത്തന ജീവിതത്തില്‍ ഞാന്‍ നേരിട്ട ഒട്ടനവധി പ്രതിസന്ധികളെ തരണം ചെയ്യാനായത് ഒരു ജനപ്രതിനിധി എന്ന നിലയില്‍ ജനങ്ങളോട് പുലര്‍ത്തിയ ആത്മാര്‍ത്ഥത കൊണ്ടും , പാര്‍ട്ടിയിലെ സഹപ്രവര്‍ത്തകര്‍ നല്‍കിയ പിന്തുണ കൊണ്ടും മാത്രമാണ്.
ഇപ്പോള്‍ സോഷ്യല്‍ മീഡിയയില്‍ നടക്കുന്ന പ്രചാരണങ്ങള്‍ ഏറെ വേദനാജനകമാണ്. ഇതിന്റെ വസ്തുതകള്‍ വ്യക്തമായി മനസിലാക്കാതെ തേജോവധം ചെയ്യുകയെന്ന സ്ഥാപിത താല്‍പര്യത്തോടെ ചിലര്‍ സോഷ്യല്‍ മീഡിയയില്‍ സൃഷ്ടിച്ചെടുത്ത വൈകാരികതയില്‍ യഥാര്‍ത്ഥ പാര്‍ട്ടി പ്രവര്‍ത്തകര്‍ക്ക് പ്രയാസം ഉണ്ടായിട്ടുണ്ട് എന്ന് ഞാന്‍ മനസിലാകുന്നു. എന്നെ ഞാനാക്കിയ ഈ പ്രസ്ഥാനത്തിലെ ഓരോ പ്രവര്‍ത്തകരും എന്റെ ഹൃദയത്തിന്റെ ഭാഗമാണ്. എപ്പോഴുമെന്ന പോലെ നിങ്ങളുടെ അഭിപ്രായത്തെ ഞാന്‍ മാനിച്ച് കൊണ്ട് സതീഷിനെ തല്‍സ്ഥാനത്ത് നിന്ന് നീക്കം ചെയ്യുന്നതിനുള്ള നടപടികള്‍ ആരംഭിച്ചു.
