ന്യൂഡല്‍ഹി:കഞ്ചിക്കോട് കോച്ച് ഫാക്ടറിയില്‍ കേന്ദ്രസര്‍ക്കാര്‍ രാഷ്ട്രീയം കളിക്കുകയാണെന്ന് എകെ ആന്റണി.യുഡിഎഫ് എംപിമാര്‍ നടത്തിയ ധര്‍ണ ഉദ്ഘാടനം ചെയ്ത് സംസാരിക്കുകയായിരുന്നു അദേഹം.കഞ്ചിക്കോട്ടെ കോച്ച് ഫാക്ടറി എത്രയും വേഗം യാഥാര്‍ത്ഥ്യമാക്കിയില്ലെങ്കില്‍ സമരം ശക്തമാക്കും. കേന്ദ്ര സര്‍ക്കാര്‍ കേരളത്തിന് നല്‍കിയ വാഗ്ദാനം പാലിക്കണണം.ഇന്നത്തെ സമരത്തോട് കൂടി ഒന്നും അവസാനിക്കാന്‍ പോകുന്നില്ല. ഇതൊരു തുടക്കം മാത്രമാണ്.
മുന്‍ യു.പി.എ സര്‍ക്കാരിന്റെ കാലത്ത് അനുവദിച്ച കോച്ച് ഫാക്ടറിക്കായി നടപടികള്‍ പൂര്‍ത്തിയാക്കിയതാണ്. എന്നാല്‍, അടുത്ത പൊതുതിരഞ്ഞെടുപ്പ് വന്നതോടെ ബി.ജെ.പി സര്‍ക്കാര്‍ അധിതകാരത്തിലെത്തിയപ്പോള്‍ നടപടികള്‍ മന്ദഗതിയിലായെന്ന് ആന്റണി കുറ്റപ്പെടുത്തി.
കേരളത്തിന്റെ ചിരകാല അഭിലാഷമാണ് കോച്ച് ഫാക്ടറി. അത് എന്തുവില കൊടുത്തും നേടിയെടുക്കും. വേണ്ടിവന്നാല്‍ സംയുക്ത പ്രക്ഷോഭം നടത്തുമെന്നും ആന്റണി പറഞ്ഞു. കോച്ച് ഫാക്ടറി അട്ടിമറിക്കാനാണ് കേന്ദ്രത്തിന്റെ ശ്രമം. റായ്ബറേലിയിലെ കോച്ച് ഫാക്ടറിക്ക് മുന്‍ഗണന നല്‍കാന്‍ കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി കത്ത് നല്‍കിയെങ്കില്‍ ആ കത്ത് ഹാജരാക്കണം
യു.പി.എയുടെ എല്ലാ പദ്ധതികളും മോദി സര്‍ക്കാര്‍ അട്ടിമറിക്കുകയാണ്. കോച്ച് ഫാക്ടറി പ്രവര്‍ത്തനം തുടങ്ങാത്തതിനെതിരെ നടത്തിയ സമരത്തെ കുറിച്ച് മുഖ്യമന്ത്രി പിണറായി വിജയന്‍ പ്രതിപക്ഷത്തെ അറിയിച്ചില്ലെന്നും അദ്ദേഹം കുറ്റപ്പെടുത്തി.
ആകാശത്തുകൂടി ട്രെയിന്‍ ഓടിപ്പിക്കാന്‍ പറ്റില്ലെന്ന കേന്ദ്രമന്ത്രിയുടെ പ്രസ്താവനയെ വിമര്‍ശിച്ച് മുഖ്യമന്ത്രി പിണറായി വിജയനും രംഗത്തെത്തിയിരുന്നു.
കേരളത്തില്‍ കേന്ദ്രം പറയുന്നത് പോലെ സ്ഥലം ഏറ്റെടുക്കാന്‍ കഴിയില്ല. കാര്യങ്ങള്‍ മനസ്സിലാക്കാന്‍ കേന്ദ്രമന്ത്രി ശ്രമിക്കണം. കേന്ദ്ര മന്ത്രി ആയതുകൊണ്ട് എന്തും വിളിച്ച് പറയരുതെന്നും വസ്തുതകള്‍ മലസ്സിലാക്കണമെന്നും മുഖ്യമന്ത്രി വ്യക്തമാക്കിയിരുന്നു.
