കോഴിക്കോട്: ജെഡിഎസുമായി ലയനം വേണ്ടെന്ന് എല്‍ജെഡിയില്‍ ധാരണ. കോഴിക്കോട് ചേര്‍ന്ന എല്‍ജെഡി സംസ്ഥാന നേതൃയോഗത്തിലാണ് തീരുമാനം. കര്‍ണാടക തിരഞ്ഞെടുപ്പില്‍ ജെഡിഎസ് 19 സീറ്റില്‍ ഒതുങ്ങിയതാണ് ലയനത്തില്‍ നിന്ന് എല്‍ജെഡി പിന്തിരിയാന്‍ കാരണം. 14 വര്‍ഷങ്ങള്‍ക്ക് ശേഷം വീണ്ടും പഴയ ജെഡിഎസാകാനുളള നീക്കമാണ് എല്‍ജെഡി ഉപേക്ഷിക്കുന്നത്. ലയനം വേണ്ടെന്നാണ് ഭൂരിഭാഗം ജില്ലാ കമ്മിറ്റികളുടേയും അഭിപ്രായം.
ജെഡിഎസ് ഇല്ലെങ്കില്‍ പകരം ആരുമായി ലയനമെന്ന് തീരുമാനിച്ചിട്ടില്ല. ആര്‍ജെഡിക്കൊപ്പം നില്‍ക്കുമെന്നാണ് സൂചന. ഈ മാസം 28ന് കോഴിക്കോട്ടെത്തുന്ന തേജസ്വി യാദവ് അടക്കമുളള നേതാക്കളുമായി എല്‍ജെഡി ചര്‍ച്ച നടത്തുമെന്നാണ് വിവരം. കഴിഞ്ഞ വര്‍ഷം ലയന ചര്‍ച്ചകള്‍ക്ക് തുടക്കമിട്ട ഇരു പാര്‍ട്ടികളും ഈ ജനുവരിയില്‍ ഒന്നാകുമെന്നായിരുന്നു നേരത്തെ പ്രഖ്യാപിച്ചിരുന്നത്. ഇത് അനുസരിച്ച് 7 വീതം ജില്ലകളിലെ ഭാരവാഹിത്വം പങ്കിട്ടെടുക്കാനും ബോര്‍ഡ്, കോര്‍പ്പറേഷന്‍ സ്ഥാനങ്ങളില്‍ തീരുമാനമെടുക്കാനും ഏഴംഗ സമിതിയെ നിയോഗിച്ചിരുന്നു. എന്നാല്‍ പലതവണ യോഗം ചേര്‍ന്നിട്ടും ലയന കാര്യത്തില്‍ അന്തിമ തീരുമാനത്തിലെത്തിയിരുന്നില്ല.
