ന്യൂഡല്‍ഹി: ലോക്‌സഭാ തിരഞ്ഞെടുപ്പിലെ സീറ്റുകളുടെ എണ്ണം ഇനി പ്രവചിക്കില്ലെന്ന് രാഷ്ട്രീയ തന്ത്രജ്ഞന്‍ പ്രശാന്ത് കിഷോര്‍. തിരഞ്ഞെടുപ്പ് പ്രവചനത്തില്‍ തെറ്റുപറ്റിപ്പോയെന്നും അദ്ധേഹം പറഞ്ഞു. എന്റെ വിലയിരുത്തല്‍ ഞാന്‍ നിങ്ങളുടെ മുന്നില്‍ പറഞ്ഞിരുന്നു. എന്നാല്‍ സീറ്റുകളുടെ എണ്ണത്തില്‍ അത് തെറ്റായിരുന്നെന്ന് സമ്മതിക്കുന്നു. ബിജെപി 300 സീറ്റിലെത്തുമെന്ന് പറഞ്ഞെങ്കിലും 240 സീറ്റുകള്‍ മാത്രമാണ് ലഭിച്ചത്. എന്നാല്‍ നരേന്ദ്ര മോദിയോട് ജനങ്ങള്‍ക്ക് നേരിയ അതൃപ്തിയുണ്ടെന്ന് ഞാന്‍ പറഞ്ഞിരുന്നു.
ഒരു തന്ത്രജ്ഞന്‍ എന്ന നിലയില്‍ ഇനി സീറ്റുകളുടെ എണ്ണം പ്രവചിക്കാന്‍ പാടില്ലെന്ന് മനസ്സിലാക്കുന്നു. കഴിഞ്ഞ രണ്ടു വര്‍ഷത്തിനിടെ ബംഗാള്‍ നിയമസഭാ തിരഞ്ഞെടുപ്പിലും ഇക്കഴിഞ്ഞ ലോക്‌സഭാ തിരഞ്ഞെടുപ്പിലും മാത്രമാണ് സീറ്റുകളുടെ എണ്ണം പറഞ്ഞുള്ള പ്രവചനം നടത്തിയത്” അദ്ദേഹം പറഞ്ഞു. സംഖ്യകള്‍ മാറ്റിവച്ചാല്‍ താന്‍ പറഞ്ഞതെല്ലാം ശരിയായെന്നും പ്രശാന്ത് കിഷോര്‍ വ്യക്തമാക്കി.
