തിരുവനന്തപുരം : ആരോഗ്യമന്ത്രിയുടെ പേഴ്സണൽ സ്റ്റാഫ് അഖിൽ സജീവിനെതിരെ കൂടുതൽ ആരോപങ്ങൾ. നോർക്ക റൂട്ടിൽ ജോലി വാഗ്ദാനം ചെയ്ത് 5 ലക്ഷം രൂപ തട്ടിയെടുത്തെന്ന് അഭിഭാഷകനായ ശ്രീകാന്താണ് പരാതിയുമായി രംഗത്ത് വന്നത്. മുഖ്യമന്ത്രിയുടെ ഓഫീസുമായി ബന്ധമുണ്ടെന്ന് പറഞ്ഞാണ് ഇയാൾ പണം തട്ടിയതെന്നും ശ്രീകാന്ത് ഒരു മാധ്യമത്തോട് വെളിപ്പെടുത്തി. സിപിഎം ഇടപെട്ട് പണം തിരികെ നൽകിയെന്നും തന്റെ പരാതിയെ തുടർന്നാണ് അഖിലിനെതിരെ നടപടി എടുത്തതെന്നും ശ്രീകാന്ത് വ്യക്തമാക്കി. ഭാര്യക്ക് നോർക്ക റൂട്ട്സിൽ ജോലി വാങ്ങി നൽകാമെന്ന് പറഞ്ഞാണ് അഖിൽ സജീവ് പണം വാങ്ങിയതെന്നാണ് ശ്രീകാന്തിന്റെ പരാതി.
ആയുഷ് വകുപ്പിൽ ഹോമിയോ മെഡിക്കൽ ഓഫീസർ തസ്തികയിലെ നിയമനത്തിന് 15 ലക്ഷം രൂപ ആവശ്യപ്പെട്ടുവെന്നും പലതവണയായി കുറേയേറെ പണം നൽകിയെന്നുമാണ് പരാതിക്കാരനായ മലപ്പുറം സാജു റോഡിലെ കാവിൽ അതിരാകുന്നത്ത് ഹരിദാസൻ കുമ്മാളി ആരോപിച്ചിരിക്കുന്നത്. ഇതോടൊപ്പം ആയുഷ് വകുപ്പിൽ മെഡിക്കൽ ഓഫീസർ തസ്തികയിൽ നിയമനം നൽകാമെന്നുപറഞ്ഞ് പണം വാങ്ങിയവർ വ്യാജരേഖ ചമച്ചുവെന്ന ആരോപണവും ഉയർന്നിട്ടുണ്ട്.
അതേസമയം ഈ സംഭവത്തിൽ ആരോപണ വിധേയനായ അഖില്‍ സജീവ് മുൻപും തട്ടിപ്പ് നടത്തിയിട്ടുണ്ടെന്നാണ് ഇപ്പോൾ പുറത്തു വരുന്ന വിവരങ്ങൾ. തട്ടിപ്പ് നടത്തിയതിൻ്റെ പേരിൽ സിപിഎമ്മില്‍നിന്ന് ഒരുവര്‍ഷംമുമ്പ് അഖിൽ സജീവിനെ പുറത്താക്കിയതാണെന്നും വിവരങ്ങൾ പുറത്തുവരുന്നുണ്ട്. മുമ്പ് കളക്ഷന്‍ ഫണ്ട് തിരിമറിയുടെ പേരില്‍ സിഐടിയു പത്തനംതിട്ട ജില്ലാ ഓഫീസ് ജീവനക്കാരനായിരുന്ന അഖില്‍ സജീവിനെ ജോലിയില്‍നിന്ന് പുറത്താക്കിയിരുന്നു. ഈ സംഭവത്തിൽ അഖിൽ സജീവ് രണ്ടര ലക്ഷത്തോളം രൂപ തിരിച്ചടച്ചിട്ടുണ്ട്.
അഖിൽ സജീവിനെതിരെ പത്തനംതിട്ട പൊലീസ് അന്ന് കേസ് എടുത്തിരുന്നു. ഇതിനിടെ ദേവസ്വത്തില്‍ ജോലി നല്‍കാമെന്ന് പറഞ്ഞും ഇയാള്‍ തട്ടിപ്പു നടത്തിയെന്ന ആരോപണവും ഉയർന്നിരുന്നു. മാത്രമല്ല വിസ തട്ടിപ്പിലും ഇയാൾക്കെതിരെ ആരോപണം ഉയർന്നിരുന്നു എന്നും വിവരങ്ങളുണ്ട്. അഖില്‍ മാത്യു കുമ്പഴ സ്വദേശിയും അഖില്‍ സജീവ് വള്ളിക്കോട് സ്വദേശിയുമാണ്. ദേശീയ ആരോഗ്യമിഷനു കീഴിൽ ഹോമിയോ ഡോക്ടർ നിയമനത്തിന് കഴിഞ്ഞ ഫെബ്രുവരിയിൽ പത്രങ്ങളിൽ പരസ്യംകണ്ട് പരാതി നൽകിയ ഹരിദാസൻ കുമ്മാളിയുടെ മകൻ്റെ ഭാര്യ ഡോ. നിതി പരീക്ഷ എഴുതിയിരുന്നു.
തുടർന്ന് മാർച്ച് 10ന് അഖിൽ സജീവ് എന്ന വ്യക്തി തന്നെ കാണാൻ മലപ്പുറത്ത് എത്തി എന്നാണ് ഹരിദാസൻ പറയുന്നത്. പത്തനംതിട്ടയിലെ സിപിഎം. പ്രവർത്തകനും സിഐടിയു ഓഫീസ് സെക്രട്ടറിയുമാണ് താനെന്നാണ് അഖിൽ സജീവ് പരിചയപ്പെടുത്തിയത്. ഹോമിയോ ഡോക്ടർ നിയമനത്തിന് മരുമകൾ അപേക്ഷ നൽകിയിട്ടുണ്ടോ എന്ന് തിരക്കിയ ഇയാൾ അപേക്ഷ നൽകിയതുകൊണ്ടോ സാധാരണരീതിയിൽ പരീക്ഷയ്ക്കും അഭിമുഖത്തിനും ഹാജരായതുകൊണ്ടോ ജോലി കിട്ടില്ലെന്നും കിട്ടണമെങ്കിൽ അഞ്ചുലക്ഷം രൂപ നൽകണമെന്നും ആവശ്യപ്പെട്ടുവെന്നും ഹരിദാസൻ പറയുന്നു.
പണം നൽകിയാൽ ആദ്യം താത്‌കാലികനിയമനം നൽകാമെന്നും മൂന്നുവർഷം കഴിഞ്ഞ് സ്ഥിരംനിയമനം നൽകാമെന്നുമാണ് അഖിൽ സജീവ് പറഞ്ഞത്. സ്ഥിര നിയമനം കിട്ടിക്കഴിഞ്ഞ ശേഷം മാത്രം ബാക്കി 10 ലക്ഷം നൽകണമെന്നും അതിൽ വ്യക്തമാക്കിയിരുന്നു. ഈ ഡീൽ സമ്മതിച്ച ഹരിദാസൻ മാർച്ച് 24-ന് ഗൂഗിൾ പേ വഴി 25,000 രൂപ മുൻകൂറായി നൽകിയെന്നും വ്യക്തമാക്കുന്നു.
ഇതിനിടെ ആരോഗ്യവകുപ്പിൽ അഖിൽ മാത്യു എന്ന പേരിൽ മന്ത്രിക്ക് ഒരു ബന്ധു ഉണ്ടെന്നും ഇയാളാണ് കാര്യങ്ങൾ തീരുമാനിക്കുന്നതെന്നും അഖിൽ സജീവ് ഹരിദാസനെ അറിയിച്ചു. തിരുവനന്തപുരത്ത് പോയി അദ്ദേഹത്തെ കാണേണ്ട രീതിയിൽ കാണണമെന്നും സജീവ് ഹരിദാസനോട് പറഞ്ഞു.
ഇതിനെ തുടർന്ന് ഏപ്രിൽ ഒൻപതിന് തിരുവനന്തപുരത്തെത്തി അഖിൽ മാത്യുവിനെ കാണാൻ ശ്രമിച്ചു. എന്നാൽ കാണാൻ കഴിഞ്ഞില്ല. പിറ്റേദിവസം ഉച്ചയ്ക്ക് രണ്ടരയോടെ അഖിൽ മാത്യു മന്ത്രിയുടെ ഓഫീസിൽനിന്ന് ഇറങ്ങിവന്നു. അഖിൽ സജീവ് പറഞ്ഞയാളല്ലേ എന്നു ചോദിച്ച് കൂടിക്കാഴ്ച നടന്ന സ്ഥലത്തു നിന്നും 30 മീറ്റർ അകലെയുള്ള ഓട്ടോസ്റ്റാൻഡിലേക്ക് കൂട്ടിക്കൊണ്ടുപോകുകയായിരുന്നു. അവിടെവച്ച് ഒരു ലക്ഷം രൂപ താൻ അഖിൽ മാത്യുവിന് കൈമാറി എന്നും ഹരിദാസൻ വ്യക്തമാക്കുന്നു.
പണം കൈമാറി രണ്ടുദിവസം കഴിഞ്ഞപ്പോൾ കേരള ആയുഷ് മിഷൻ്റെ പേരിൽ നിതി രാജിന് ഒരു ഇ-മെയിൽ എത്തി. ഏപ്രിൽ 25-നുശേഷം നിയമന ഉത്തരവ് അയയ്ക്കുമെന്നായിരുന്നു അതിൽ ഉണ്ടായിരുന്നത്. ഇ-മെയിൽ കിട്ടിയതിനെ തുടർന്ന് അഖിൽ സജീവ് തന്നെ നേരിൽ വന്നു കണ്ട് 50,000 രൂപകൂടി കെെപ്പറ്റി. എന്നാൽ ഇതെല്ലാം കഴിഞ്ഞ് ദിവസങ്ങൾ കഴിഞ്ഞിട്ടും ഉത്തരവ് മാത്രം എത്തിയില്ല.
ഉത്തരവ് എത്താത്തതിനെ തുടർന്ന് ആയുഷ് മിഷൻ്റെ വണ്ടൂർ ഓഫീസിൽ തിരക്കിയപ്പോൾ നാൽപ്പതോളം പേരുടെ നിയമനം നടന്നുകഴിഞ്ഞതായി അറിയാൻ കഴിഞ്ഞു. അതിൽ തൻ്റെ മരുമകൾ മരുമകൾ ഉൾപ്പെട്ടിട്ടില്ലെന്നും വ്യക്തമായി. ഇക്കാര്യം അഖിൽ സജീവിനെ അറിയിച്ചപ്പോൾ ഇനിയും നിയമനം നടക്കാനുണ്ടെന്നായിരുന്നു മറുപടി ലഭിച്ചത്. അഖിൽ മാത്യുവിനെ ബന്ധപ്പെടാൻ ശ്രമിച്ചെങ്കിലും കഴിഞ്ഞില്ലെന്നും ഹരിദാസൻ പറയുന്നു. തുടർന്ന് ഹരിദാസൻ മന്ത്രിക്ക് പരാതി നൽകുകയായിരുന്നു.
അതേസമയം ഇതിന് പിന്നിൽ വലിയ തട്ടിപ്പ് നടന്നിട്ടുള്ളതാണ് അന്വേഷണത്തിൻ്റെ ആരംഭ ഘട്ടത്തിൽ വ്യക്തമാകുന്നത്. ആയുഷ് വകുപ്പിൽ മെഡിക്കൽ ഓഫീസർ തസ്തികയിൽ നിയമനം നൽകാമെന്നുപറഞ്ഞ് കോഴ വാങ്ങിയവർ വ്യാജരേഖ ചമക്കുകയും ചെയ്തിട്ടുണ്ട്. ആയുഷ് മിഷൻ്റേതായി താത്‌കാലിക നിയമന ഉത്തരവ് എന്നപേരിൽ ഒരു ഇ-മെയിൽ ഡോ. നിത രാജിന് ലഭിച്ചിരുന്നു.
ഇത് വ്യാജ ഇ-മെയിൽ ആയിരുന്നു എന്നാണ് വിവരം. ഇങ്ങനെ ഒരു രേഖ തങ്ങളുടെ ഓഫീസിൽനിന്ന് അയച്ചിട്ടില്ലെന്നാണ് ആയുഷ് മിഷൻ വ്യക്തമാക്കിയിട്ടുണ്ട്. തട്ടിപ്പു നടത്തിയവർ നിയമന ഉത്തരവ് കൃത്രിമമായി സൃഷ്ടിച്ച് പണം നൽകിയവർക്ക് അയക്കുകയായിരുന്നു എന്നാണ് വിവരം. അതേസമയം നിരവധി ഉദ്യോഗാർത്ഥികൾ ഈ സംഘത്തിൻ്റെ കെണിയിൽ കുടുങ്ങിയിട്ടുണ്ടോ എന്ന് സംശയത്തിലും അന്വേഷണം നടക്കുന്നുണ്ട്.
