ചെങ്ങന്നൂര്‍: വിദ്യാര്‍ഥിനിയെ പീഡിപ്പിക്കാന്‍ ശ്രമിച്ച കേസില്‍ കായികാധ്യാപകന്‍ അറസ്റ്റില്‍. എസ്.എന്‍ സദനത്തില്‍ എസ്.സുരേഷ് കുമാറിനെയാണ് (കുമാര്‍ -43) പോക്സോ നിയമ പ്രകാരം മാന്നാര്‍ പൊലിസ് അറസ്റ്റ് ചെയ്തത്. പ്രതി ഇത്തരത്തില്‍ പല വിദ്യാര്‍ത്ഥിനികള്‍ക്ക് നേരെയും പീഡന ശ്രമം നടത്തിയിട്ടുണ്ടെന്നാണ് പൊലിസ് പറയുന്നത്.
മാന്നാറിന്റെ സമീപ പ്രദേശങ്ങളിലുള്ള ചില സ്‌കൂളുകളില്‍ താല്‍ക്കാലിക കായിക അധ്യാപകനായി ജോലിചെയ്ത് വന്നിരുന്ന സുരേഷ്‌കുമാര്‍ കുട്ടികള്‍ക്ക് കായികപരിശീലനം നല്‍കുന്നതിനിടെ വിദ്യാര്‍ഥിനിയോട് അപമര്യാദയായി പെരുമാറുകയും പീഡിപ്പിക്കാന്‍ ശ്രമിക്കുകയും ആയിരുന്നുവെന്നാണ് കേസ്. വിദ്യാര്‍ഥിനി സംഭവം വീട്ടിലറിയിച്ചതിനെതുടര്‍ന്ന് രക്ഷകര്‍ത്താക്കള്‍ മാന്നാര്‍ പൊലിസില്‍ പരാതി നല്‍കുകയായിരുന്നു.
ഒരാഴ്ചയായി പലയിടങ്ങളിലായി ഒളിവില്‍ കഴിഞ്ഞു വന്നിരുന്ന പ്രതിയെ മാന്നാര്‍ പൊലിസ് ഇന്‍സ്‌പെക്ടര്‍ എ.അനീഷിന്റെ. നേതൃത്വത്തില്‍ എസ്.ഐ.സി.എസ്.അഭിരാം , വനിത എ.എസ്.ഐ സ്വര്‍ണ്ണ രേഖ, സീനിയര്‍ സിവില്‍ പോലീസ് ഓഫീസര്‍ അജിത്ത്കുമാര്‍, സിവില്‍ പോലീസ് ഓഫീസര്‍മാരായ ഹരിപ്രസാദ്, വിഷ്ണു എന്നിവരടങ്ങുന്ന സംഘത്തിന്റെ അന്വേഷണത്തിലാണ് പിടികൂടിയത്.
