തൃശൂര്‍: തൃശൂരില്‍ ആള്‍കൂട്ട മര്‍ദ്ദനത്തിനിരയായ യുവാവ് ഗുരുതരാവസ്ഥയില്‍. ചേലക്കര കിള്ളിമംഗലത്ത് വെച്ചാണ് ആക്രണം നടന്നത്. വെട്ടിക്കാട്ടിരി സ്വദേശി സന്തോഷിനാണ് മര്‍ദ്ദനത്തെ തുടര്‍ന്ന് പരുക്കേറ്റത്. തലയ്ക്ക് ഗുരുതരമായി പരുക്കേറ്റ സന്തോഷിനെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. യുവാവിനെ ശസ്ത്രക്രിയക്ക് വിധേയമാക്കി.
വെള്ളിയാഴ്ച പലുര്‍ച്ചെ രണ്ട് മണിയോടെയായിരുന്നു സംഭവം. പ്രദേശത്തെ അബ്ബാസെന്നയാളുടെ വീട്ടില്‍ നിന്ന് അടക്ക മോഷ്ടിക്കാന്‍ ശ്രമിച്ചെന്നാരോപിച്ചായിരുന്നു മര്‍ദ്ദിച്ചത്. നിരന്തരമായി മോഷണം നടക്കാറുള്ളതിനാല്‍ വീട്ടില്‍ സിസിടിവി ക്യാമറ സ്ഥാപിച്ചിരുന്നു. സിസിടിവി ദൃശ്യത്തിലൂടെയണ് മോഷണ ശ്രമം കണ്ടെത്തിയത്. സന്തോഷ് വീട്ടിലെത്തി അടയ്ക്ക വെക്കുന്നിടത്തേക്ക് പോകുന്നത് ദൃശ്യങ്ങളില്‍ വ്യക്തമാണ്. പിടികൂടിയ സന്തോഷിനെ നാട്ടുകാരും വീട്ടുകാരും ചേര്‍ന്ന് പിടികൂടി കെട്ടിയിട്ട് ആക്രമിക്കുകയായിരുന്നുവെന്ന് പൊലീസ് പറഞ്ഞു. യുവാവിനെ മര്‍ദിക്കുന്നതിന്റെ വീഡിയോ പൊലീസിന് ലഭിച്ചിട്ടുണ്ട്. യുവാവ് വീടിന്റെ ഗെയിറ്റ് ചാടിക്കടന്നപ്പോള്‍ പറ്റിയതാണ് പരുക്കെന്നാണ് നാട്ടുകാര്‍ പറയുന്നത്. സംഭവത്തില്‍ പൊലീസ് കേസെടുത്ത് അന്വേഷണം ആരംഭിച്ചു.
