കൊച്ചി: പൊലീസെന്ന വ്യാജേന ഭീഷണിപ്പെടുത്തി സ്വര്‍ണവും പണവും കവരുന്ന മഹാരാഷ്ട്ര സ്വദേശികളായ നാലംഗ സംഘത്തെ പൊലിസ് സാഹസീകമായി പിടികൂടി. എറണാകുളത്തും ത്യശൂരിലുമായി നിരവധി കവര്‍ച്ചാകേസുകളില്‍ പ്രതികളാണ് പിടിയിലായവരെന്ന് പൊലീസ് അറിയിച്ചു.
ഇന്നലെ രാവിലെ ഇവര്‍ തൃശൂരില്‍ വച്ച് പൊലീസ് ചമഞ്ഞ് കവര്‍ച്ച നടത്തിയിരുന്നു. തുടര്‍ന്ന് എറണാകുളത്തേക്ക് വരുന്ന വഴിയാണ് സംഘം പിടിയിലായത്. മുളവുകാട് വച്ച് ഇവരെ പിടികൂടാന്‍ പൊലീസ് ശ്രമം നടത്തിയിരുന്നെങ്കിലും ഉദ്യോഗസ്ഥരെ വെട്ടിച്ച് കവര്‍ച്ചാ സംഘം കടന്നുകളയുകയായിരുന്നു. എന്നാല്‍ പിന്നാലെ എത്തിയ പൊലീസ് ഇവരെ കോതാട് വെച്ച് പിടികൂടി.
കാറിലും ബൈക്കിലുമായി അഞ്ച് പേരാണ് ഉണ്ടായിരുന്നത്. ഇതില്‍ കാറിലെത്തിയ നാല്പേരാണ് ഇപ്പോള്‍ പിടിയിലായിരിക്കുന്നത്. ബൈക്കിലെത്തിയ അഞ്ചാമന്‍ കടന്നുകളഞ്ഞതായി പൊലീസ് പറഞ്ഞു. സൗത്ത് പൊലീസ് സ്റ്റേഷനില്‍ എത്തിച്ച ഇവരെ വിശദമായി ചോദ്യം ചെയ്തുവരികയാണെന്ന് ഉദ്യോഗസ്ഥര്‍ അറിയിച്ചു.
