ആലുവയില്‍ നാണയം വിഴുങ്ങിയതിന് പിന്നാലെ മൂന്ന് വയസുകാരന്‍ മരിച്ച സംഭവത്തില്‍ അന്വേഷണം അട്ടിമറിക്കാന്‍ ശ്രമമെന്ന് കുടുബം. പോസ്റ്റ്‌മോര്‍ട്ടത്തില്‍ കുഞ്ഞിന്റെ ശരീരത്തില്‍ നിന്ന് രണ്ട് നാണയങ്ങള്‍ കണ്ടെത്തിയിരുന്നു. ന്യൂമോണിയ ബാധിച്ചതിനെ തുടര്‍ന്ന് ഹൃദയത്തിന്റെ അറകള്‍ക്ക് തകരാര്‍ സംഭവിച്ചുവെന്നാണ് രാസപരിശോധന ഫലം. ഈ വാദങ്ങളെല്ലാം കുടുംബം തള്ളി. ഡോക്ടര്‍മാരെ രക്ഷിക്കാനുള്ള ശ്രമമാണ് നടക്കുന്നതെന്നും കുടുംബം ആരോപിച്ചു.
അതേസമയം ഡോക്ടര്‍മാര്‍ക്കെതിരെ നടപടി ആവശ്യപ്പെട്ട് പൃഥിരാജ് നീതി ആക്ഷന്‍ കൗണ്‍സിലിന്റെ നേതൃത്വത്തില്‍ കുടുംബാംഗങ്ങള്‍ ആലുവ ജില്ല ആശുപത്രിക്ക് മുന്നില്‍ പ്രതിഷേധമാരംഭിച്ചു. കുഞ്ഞിന്റെ യഥാര്‍ഥ മരണകാരണം അറിയുന്നത് വരെ പ്രതിഷേധം തുടരുമെന്ന് അമ്മ നന്ദിനി പറഞ്ഞു.
നാണയം വിഴുങ്ങിയതിനെ തുടര്‍ന്ന് ഈ മാസം ഒന്നാം തീയ്യതിയാണ് മൂന്ന് വയസുകാരന്‍ പൃഥിരാജിനെ ആലുവ ജില്ല ആശുപത്രിയിലെത്തിച്ചത്. പീഡിയാട്രിക് സര്‍ജന്‍ ഇല്ലെന്ന കാരണത്താല്‍ അവിടെ നിന്നും എറണാകുളം ജില്ല ആശുപത്രിയിലേക്കും പിന്നീട് ആലപ്പുഴ മെഡിക്കല്‍ കോളേജിലുമെത്തിച്ചു. എന്നാല്‍ കുഞ്ഞിനെ കിടത്തി ചികില്‍സിക്കാന്‍ ആശുപത്രി അധികൃതര്‍ തയാറായില്ലെന്നാണ് ആരോപണം.
ആരോഗ്യമന്ത്രിക്കടക്കം പരാതി നല്‍കിയിട്ടും നടപടിയില്ലാത്തതിനാലാണ് കുടുംബം പ്രതിഷേധത്തിനൊരുങ്ങിയത്. അനവര്‍ സാദത്ത് എംഎല്‍എ കുടുംബാംഗങ്ങളെ സന്ദര്‍ശിച്ചു.
