തിരുവനന്തപുരം: പുതുക്കാടിനും തൃശൂരിനും ഇടയില്‍ അറ്റകുറ്റപ്പണി നടക്കുന്നതിനാല്‍ ട്രെയിന്‍ ഗതാഗതത്തില്‍ ഇന്നും നാളെയും നിയന്ത്രണം ഏര്‍പ്പെടുത്തിയതായി റെയില്‍വേ. ജനശതാബ്ദി അടക്കം നാലു ട്രെയിനുകള്‍ പൂര്‍ണമായും മൂന്നു ട്രെയിനുകള്‍ ഭാഗികമായും റദ്ദാക്കിയെന്ന് റെയില്‍വെ അറിയിച്ചു.
ഉച്ചയ്ക്ക് 2.50നുള്ള തിരുവനന്തപുരം-കണ്ണൂര്‍ ജനശതാബ്ദി, വൈകീട്ട് 5.35ന്റെ എറണാകുളം- ഷൊര്‍ണൂര്‍ മെമു, രാത്രി 7.40ന്റെ എറണാകുളം-ഗുരുവായൂര്‍ എക്സ്പ്രസ് എന്നിവയാണ് റദ്ദാക്കിയത്. നാളെ രാവിലെ 4.50നുള്ള കണ്ണൂര്‍- തിരുവനന്തപുരം ജനശതാബ്ദിയും പൂര്‍ണമായും റദ്ദാക്കി. ആലപ്പുഴയില്‍ നിന്ന് രാവിലെ ആറിന് ദന്‍ബാദിലേക്ക് പോകുന്ന ആലപ്പുഴ-ദന്‍ബാദ് എക്സ്പ്രസ് ഒന്നര മണിക്കൂര്‍ വൈകുമെന്നും റെയില്‍വെ അറിയിച്ചു. 10.10ന്റെ കന്യാകുമാരി ബംഗളൂരു എക്സ്പ്രസ് രണ്ടു മണിക്കൂര്‍ വൈകി മാത്രമേ കന്യാകുമാരിയില്‍ നിന്ന് സര്‍വീസ് ആരംഭിക്കൂ. ഇന്ന് ഉച്ച 2.50നുള്ള കണ്ണൂര്‍-എറണാകുളം എക്സ്പ്രസ് തൃശൂരില്‍ യാത്ര അവസാനിപ്പിക്കും. മൂന്നു മണിക്ക് തിരുവനന്തപുരത്ത് നിന്ന് പുറപ്പെടേണ്ട ചെന്നൈ മെയില്‍ തൃശൂരില്‍ നിന്ന് രാത്രി 8.43ന് പുറപ്പെടും.
ട്രെയിന്‍ സര്‍വീസുകള്‍ റദ്ദാക്കിയതിനെ തുടര്‍ന്ന് കെഎസ്ആര്‍ടിസി പ്രത്യേക സര്‍വീസുകള്‍ ഏര്‍പ്പെടുത്തി. യാത്രക്കാരുടെ ആവശ്യത്തിന് അനുസരിച്ച് അധിക സര്‍വീസുകള്‍ നടത്താന്‍ തയ്യാറാണെന്ന് കെഎസ്ആര്‍ടിസി അറിയിച്ചു. എറണാകുളം, കോഴിക്കോട്, കണ്ണൂര്‍ ഭാഗത്തേക്കായിരിക്കും പ്രത്യേക സര്‍വീസുകള്‍. സീറ്റുകള്‍ ആവശ്യാനുസരണം കെഎസ്ആര്‍ടിസിയുടെ വെബ്സൈറ്റില്‍ റിസര്‍വ് ചെയ്യാവുന്നതാണ്.
