ന്യൂഡല്‍ഹി: വിമാന തകരാറുമൂലം യാത്രമുടങ്ങിയ യാത്രക്കാര്‍ക്ക് ടിക്കറ്റ് തുക മുഴുവനും തിരിച്ചുനല്‍കുമെന്ന് എയര്‍ ഇന്ത്യ അധികൃതര്‍. ന്യൂഡല്‍ഹിയില്‍നിന്ന് സാന്‍ഫ്രാന്‍സിസ്‌കോയിലേക്ക് പോയ എയര്‍ ഇന്ത്യ വിമാനത്തിലെ യാത്രക്കാര്‍ക്ക് വിമാനം 30 മണിക്കൂര്‍ വൈകിയതിനെത്തുടര്‍ന്നാണ് എയര്‍ ഇന്ത്യയുടെ നടപടി. യാത്രക്കാരുടെ സുരക്ഷയെ കരുതിയാണ് വിമാനം റഷ്യയില്‍ ഇറക്കിയത്. യാത്രക്കാര്‍ക്ക് ബുദ്ധിമുട്ട് നേരിട്ടതില്‍ ഖേദിക്കുന്നു. ഈ വിമാനത്തില്‍ യാത്രചെയ്തവര്‍ക്ക് ഭാവിയിലെ യാത്രകള്‍ക്ക് വൗച്ചര്‍ നല്‍കുമെന്നും എയര്‍ ഇന്ത്യ അറിയിച്ചു. വ്യാഴാഴ്ചയായിരുന്നു എ.ഐ.-183 വിമാനം സാങ്കേതികത്തകരാറിനെത്തുടര്‍ന്ന് റഷ്യയിലെ വിമാനത്താവളത്തില്‍ ഇറക്കിയത്.
