സിക വൈറസില്‍ ആശങ്കപ്പെടേണ്ട സാഹചര്യമില്ലന്ന് തിരുവനന്തപുരം മേയര്‍ ആര്യാ രാജേന്ദ്രന്. ഒരാഴ്ച വാര്‍ഡുതല ശുചീകരണവും ഓഫീസുകളിലെ ശുചീകരണവും നടത്തും.
ആക്ഷന്‍ പ്ലാന്‍ പ്രകാരം ഒരു വാര്‍ഡിനെ 7 ആയി തിരിച്ചാണ് പ്രവര്‍ത്തനങ്ങള്‍. തീവ്ര ഉറവിട നശീകരണ യജ്ഞം എന്ന പേരില്‍ കൊതുകുകളുടെ ഇറവിടങ്ങള്‍ നശിപ്പിക്കുകയാണ് നഗരസഭ. തിരുവനന്തപുരം നഗരസഭ വളപ്പില്‍ തന്നെ യജ്ഞത്തിന് തുടക്കം കുറച്ചു.
മാലിന്യ നീക്കത്തിനൊപ്പം ഫോഗിംഗ് ഉള്‍പ്പെടെയുള്ള നടപടികളും നേരത്തെ തന്നെ ആരംഭിച്ചിരുന്നു. പൊതുജനങ്ങള്‍ സ്വന്തം വീടും പരിസരവും ശുചിയാക്കണമെന്ന് മേയര്‍ ആര്യാ രാജേന്ദ്രന് ഓര്‍മിപ്പിച്ചു.
അതേസമയം, സംസ്ഥാനത്ത് 35 പേര്‍ക്കാണ് സിക സ്ഥിരീകരിച്ചിരിക്കുന്നത്. 11 പേര്‍ നിലവില്‍ രോഗികളായുണ്ട്. ബാക്കി പേര്‍ നെഗറ്റീവായിട്ടുണ്ട്. ഇന്നലെ മാത്രം അഞ്ച് പേര്‍ക്കാണ് സിക സ്ഥിരീകരിച്ചത്.
