തിരുവനന്തപുരം: തിരുവനന്തപുരം പോത്തന്‍കോട് നിന്ന് കാണാതായ 19കാരിയായ കോളേജ് വിദ്യാര്‍ത്ഥിനിയെ കണ്ടെത്തി. കഴിഞ്ഞ 30നാണ് വിദ്യാര്‍ത്ഥിനിയെ കാണാതായത്. കാണാതായി 15 ദിവസങ്ങള്‍ക്ക് ശേഷം കോഴിക്കോട് നിന്നാണ് വിദ്യാര്‍ത്ഥിനിയെ കണ്ടെത്തിയത്. വീടുവിട്ടിറങ്ങിയ വിദ്യാര്‍ത്ഥിനി മംഗലാപുരത്ത് ഒരു തുണിക്കടയില്‍ ജോലി ചെയ്തുവരികയായിരുന്നു. ജോലി മതിയാക്കി കോഴിക്കോട്ടേക്ക് തീവണ്ടിയില്‍ വരുമ്പോള്‍ കെഎസ്ആര്‍ടിസി ജീവനക്കാരന്‍ വിദ്യാര്‍ത്ഥിനിയെ തിരിച്ചറിയുകയായിരുന്നു. തുടര്‍ന്ന് ആര്‍പിഎഫിനെ വിവരമറിയിക്കുകയും കോഴിക്കോട് വനിതാ പൊലീസില്‍ ഏല്‍പ്പിക്കുകയുമായിരുന്നു. തുടര്‍ന്ന് പോത്തന്‍കോട് പൊലീസും ബന്ധുക്കളും കോഴിക്കോട് പൊലീസ് സ്റ്റേഷനില്‍ എത്തിച്ചേര്‍ന്നു.
