ടൈഫോയ്ഡ് വാക്‌സിന്റെ വിലകുറഞ്ഞ മരുന്നുകള്‍ പൂഴ്ത്തിവെച്ച് വിലകൂടിയ മരുന്നുകള്‍ നല്‍കുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് ആരോഗ്യവകുപ്പ് മന്ത്രി വീണാ ജോര്‍ജ്. ഇത് സംബന്ധിച്ച് ഡ്രഗ്സ് കണ്‍ട്രോളര്‍ക്ക് മന്ത്രി നിര്‍ദേശം നല്‍കി. ഭക്ഷ്യസുരക്ഷാ നടപടിക്രമങ്ങളുടെ ഭാഗമായുള്ള ഹെല്‍ത്ത് കാര്‍ഡ് എടുക്കുന്നവര്‍ക്ക് വില കൂടിയ ടൈഫോയ്ഡ് മരുന്ന് മെഡിക്കല്‍ സ്റ്റോറുകള്‍ നല്‍കുന്നു എന്ന പരാതിയെ തുടര്‍ന്നാണ് നടപടി.
ടൈഫോയ്ഡിനുള്ള വാക്‌സിന്‍ സര്‍ക്കാര്‍ ആശുപത്രികളില്ലാത്തത് പ്രശ്‌നം സൃഷ്ടിക്കുന്നുണ്ട്. അതിനാല്‍ പുറത്തുനിന്ന് വാങ്ങുന്ന മരുന്നാണ് കുത്തിവെക്കുന്നത്. മെഡിക്കല്‍ സ്‌റ്റോറുകളില്‍ 220 രൂപയാണ് വില. ഇത് ജീവനക്കാര്‍ക്ക് സാമ്പത്തിക നഷ്ടമുണ്ടാക്കുന്നു.
അതേസമയം ഭക്ഷ്യവസ്തുക്കള്‍ കൈകാര്യം ചെയ്യുന്നവര്‍ക്കുള്ള ‘ഹെല്‍ത്ത് കാര്‍ഡ്’ ഈ മാസം ഒന്ന് മുതല്‍ നിര്‍ബന്ധമാക്കാനായിരുന്നു തീരുമാനം. വ്യാപാരികളുടെ എതിര്‍പ്പിനെത്തുടര്‍ന്ന് 16വരെ സമയം നീട്ടിനല്‍കുകയായിരുന്നു.
