സംസ്ഥാനത്തെ കോളേജുകളില്‍ അദ്ധ്യാപകര്‍ക്കുമേല്‍ ഡ്രസ്സ് കോഡ് അടിച്ചേല്‍പ്പിക്കരുതെന്ന് ഉന്നത വിദ്യാഭ്യാസ വകുപ്പിന്റെ ഉത്തരവ്. ചില സ്ഥാപനങ്ങളില്‍ ഡ്രസ്സ് കോഡ് അടിച്ചേല്‍പ്പിക്കാന്‍ മാനേജ്മെന്റ് ശ്രമിക്കുന്നതായി അദ്ധ്യാപകരുടെ പരാതി ലഭിച്ചതിന്റെ അടിസ്ഥാനത്തിലാണ് നടപടി.
അദ്ധ്യാപകര്‍ക്ക് സൗകര്യപ്രദവും മാന്യവുമായ വസ്ത്രം ധരിച്ച് ജോലി ചെയ്യാമെന്നും ഉത്തരവില്‍ പറയുന്നു. അദ്ധ്യാപികമാര്‍ സാരി ധരിച്ച് ജോലി ചെയ്യണം എന്ന വിധത്തിലുള്ള യാതൊരു നിയമവും നിലവിലില്ല. തൊഴില്‍ ചെയ്യാന്‍ സൗകര്യപ്രദമായതും മാന്യമായതുമായ ഏത് വസ്ത്രം ധരിച്ചും അദ്ധ്യാപകര്‍ക്ക് സ്ഥാപനങ്ങളില്‍ പ്രവര്‍ത്തിക്കാവുന്നതാണെന്ന് ഉത്തരവില്‍ പറയുന്നു. ഇക്കാര്യത്തില്‍ ഉന്നത വിദ്യാഭ്യാസ വകുപ്പ് നേരത്തെ അറിയിപ്പ് നല്‍കിയതാണെന്നും ഉത്തരവില്‍ ചൂണ്ടിക്കാട്ടുന്നു.
എന്നാല്‍ ചില സ്ഥാപനങ്ങള്‍ ഡ്രസ്സ് കോഡ് വേണമെന്ന് പിടിവാശി കാണിക്കുന്നതായി അദ്ധ്യാപകര്‍ പരാതിപ്പെട്ടിട്ടുണ്ട്. ഡ്രസ് കോഡ് സംബന്ധിച്ച് കാലാനുസൃതമല്ലാത്ത പിടിവാശികള്‍ ചില സ്ഥാപന മേധാവികളും മാനേജുമെന്റും അടിച്ചേല്‍പ്പിക്കുന്നതായാണ് അദ്ധ്യാപകര്‍ പരാതിയില്‍ പറഞ്ഞത്. ഗവര്‍ണറുടെ ഉത്തരവ് പ്രകാരം ഉന്നത വിദ്യാഭ്യാസ വകുപ്പ് ജോയിന്റ് സെക്രട്ടറി എന്‍ സജുകുമാറാണ് ഉത്തരവിറക്കിയത്.
