സംസ്ഥാന സര്‍ക്കാര്‍ ഇന്ധന നികുതി കുറയ്ക്കാത്തതില്‍ പ്രതിഷേധിച്ച് ചക്രസ്തംഭന സമരം നടത്തി കോണ്‍ഗ്രസ്. പാലക്കാട്ടും കൊല്ലത്തും കണ്ണൂരിലും സംഘര്‍ഷമുണ്ടായി. സംഘര്‍ഷങ്ങള്‍ സ്വാഭാവികമാണെന്ന് പറഞ്ഞ കെപിസിസി അധ്യക്ഷന്‍ കെ. സുധാകരന്‍, ജോജു ജോര്‍ജിനെതിരെ കടന്നാക്രമിച്ചു. കൊച്ചിയില്‍ റോഡ് ഉപരോധത്തില്‍ പ്രശ്‌നമുണ്ടാക്കിയത് ജോജുവാണെന്ന് സുധാകരന്‍ പറഞ്ഞു.
11 മണിക്ക് ആരംഭിച്ച സമരം 15 മിനിറ്റ് നീണ്ടു നിന്നു. സംസ്ഥാന വ്യാപകമായി ജില്ലാ ആസ്ഥാനങ്ങള്‍ കേന്ദ്രീകരിച്ചാണ് സമരം. നേരത്തെ നിശ്ചയിച്ചിട്ടുള്ള സമര കേന്ദ്രങ്ങളിലാണ് പ്രതിഷേധം നടന്നത്. ഇന്ധന നികുതി കുറയ്ക്കാത്തത്തിലെ പ്രതിഷേധത്തിന്റെ ദിശ സംസ്ഥാന സര്‍ക്കാരിന് നേരെ തിരിച്ചുകൊണ്ടാണ് ജില്ലാ ആസ്ഥാനങ്ങളില്‍ കോണ്‍ഗ്രസിന്റെ ചക്രസ്തംഭന സമരം. സെക്രട്ടേറിയറ്റ് മുതല്‍ രാജഭവന് വാഹനങ്ങള്‍ തടഞ്ഞുള്ള സമരത്തിന് നേതൃത്വം നല്‍കിയ കെ.സുധാകരന്‍, സമരത്തെ അവഗണിച്ചാല്‍ ഡോസ് കൂട്ടുമെന്ന മുന്നറിയിപ്പ് നല്‍കി.
തിരുവനന്തപുരത്ത് സെക്രട്ടറിയേറ്റ് മുതല്‍ വെള്ളയമ്പലം വഴി രാജ്ഭവന്‍ വരെയാണ് സമരം നടന്നത്. എറണാകുളത്ത് ഹൈബി ഈഡന്‍ എംപി സമരം ഉദ്ഘാടനം ചെയ്തു. കോഴിക്കോട് എംകെ രാഘവന്‍ എംപിയുടെ നേതൃത്വത്തില്‍ ബിഎം ഹയര്‍സെക്കണ്ടറി സ്‌കൂളിന് സമീപമാണ് സമരം നടന്നത്. സമരം സമാധാനപരമായി അവസാനിച്ചു.
പാലക്കാട് ജില്ലയില്‍ പൊലീസും പ്രതിഷേധക്കാരും തമ്മില്‍ സംഘര്‍ഷമുണ്ടായി. പാലക്കാട് സുല്‍ത്താന്‍ പേട്ട് ജംഗ്ഷനിലാണ് സമരം നടത്തിയത്. ജംഗ്ഷന്‍ ഉപരോധിക്കാനായിരുന്നു കോണ്‍ഗ്രസ് ശ്രമിച്ചത്. എന്നാല്‍ റോഡിന്റെ ഒരു ഭാഗം ഒഴിച്ചിട്ടു കൊടുക്കാനാണ് പൊലീസ് ശ്രമിച്ചതോടെയാണ് സംഘര്‍ഷമുണ്ടായത്. വി കെ ശ്രീകണ്ഠന്‍ എംപി, രമ്യ ഹരിദാസ് എംപി, ഡിസിസി പ്രസിഡന്റ് എ തങ്കപ്പന്‍ തുടങ്ങിയവര്‍ പങ്കെടുത്തു.
കോഴിക്കോട്ടും കാസര്‍കോട്ടും യഥാക്രമം സമരങ്ങള്‍ക്ക് നേതൃത്വം നല്‍കിയ കെ.മുരളീധരനും രാജ്‌മോഹന്‍ ഉണ്ണിത്താനും വിമര്‍ശനം ജോജുവിനെതിരെ തിരിച്ചു. കൊച്ചിയിലെ റോഡ് ഉപരോധം വിമര്‍ശനത്തിനിടയാക്കിയങ്കിലും ജനങ്ങളെ ബാധിക്കുന്ന ഇന്ധന നികുതി വിഷയം ഏറ്റെടുത്ത് സമരം കടുപ്പിക്കാനാണ് കോണ്‍ഗ്രസിന്റെ തീരുമാനം.
അതേസമയം പ്രതിപക്ഷ നേതാവ് വി ഡി സതീശന്‍ ചക്രസ്തംഭന സമരത്തില്‍ പങ്കെടുത്തില്ല. അദ്ദേഹത്തിന് സാഹചര്യം അനുവദിക്കാത്തതിനാലാണ് പങ്കെടുക്കാന്‍ കഴിയാത്തതെന്ന് കെപിസിസി പ്രസിഡന്റ് കെ സുധാകരന്‍ പറഞ്ഞു. പാലക്കാട് സംഘര്‍ഷമുണ്ടായത് സ്വാഭാവികം മാത്രമാണ്. ജനങ്ങള്‍ സമരത്തോട് സഹകരിച്ചു. കൊച്ചിയില്‍ നേരത്തെയുണ്ടായ പ്രതിഷേധത്തിലെ സംഘര്‍ഷം നടന്‍ ജോജു ജോര്‍ജ് കാരണമാണെന്നും കെ സുധാകരന്‍ പറഞ്ഞു.
