നഗരസഭ കത്ത് വിവാദത്തില്‍ സമരം അവസാനിപ്പിക്കാന്‍ സര്‍ക്കാര്‍ ഇടപെടല്‍. സമരം ചെയ്യുന്ന പാര്‍ട്ടികളുടെ ജില്ലാ നേതാക്കളുമായി തദ്ദേശ വകുപ്പ് മന്ത്രി എംബി രാജേഷ് ചര്‍ച്ച നടത്തും. നാളെ വൈകിട്ട് സെക്രട്ടറിയേറ്റില്‍ ആണ് കൂടിക്കാഴ്ച. യുഡിഎഫും ബിജെപിയും സമരം ശക്തമാക്കിയിരിക്കെയാണ് സര്‍ക്കാര്‍ നടപടി. നിയമസഭ നാളെ ചേരാനിരിക്കെയാണ് സര്‍ക്കാര്‍ നീക്കമെന്നതും ശ്രദ്ധേയമാണ്.
ആഴ്ചകളായി തുടരുന്ന പ്രതിപക്ഷ പാര്‍ട്ടികളുടെ സമരം കോര്‍പറേഷന്റെ ദൈനംദിന പ്രവര്‍ത്തനങ്ങളെ ബാധിച്ചിട്ടുണ്ട്. അതേസമയം കത്ത് വ്യാജമാണെന്ന് ആവര്‍ത്തിക്കുകയാണ് മേയര്‍ ആര്യ രാജേന്ദ്രന്‍.
ഓംബുഡ്സ്മാന് മുമ്പില്‍ ഓലൈന്‍ ഹിയറിങിന് ഹാജരായപ്പോഴാണ് മേയര്‍ നിലപാട് ആവര്‍ത്തിച്ചത്. യൂത്ത് കോണ്‍ഗ്രസ് തിരുവനന്തപുരം ജില്ലാ അധ്യക്ഷന്‍ സുധീര്‍ ഷാ പാലോട് നല്‍കിയ പരാതിയിലായിരുന്നു ഹിയറിങ് വിളിച്ചത്.
കത്ത് സംബന്ധിച്ച് അന്വേഷണം നടത്തി നടപടിയെടുക്കണം എന്നായിരുന്നു പരാതിയിലെ ആവശ്യം. യഥാര്‍ത്ഥ കത്ത് ഉണ്ടെങ്കില്‍ ഹാജരാക്കാന്‍ പരാതിക്കാരന് ഓംബുഡ്സ്മാന് നിര്‍ദേശം നല്‍കിയിട്ടുണ്ട്.
