പെരുമ്പാവൂർ : വേങ്ങൂർ ഗ്രാമപഞ്ചയത്ത് ഏഴാം വാർഡിൽ നിർമ്മിക്കുന്ന വടയമ്പാറ കുടിവെള്ള പദ്ധതിക്ക് തുടക്കമായി. എൽദോസ് കുന്നപ്പിള്ളി എംഎൽഎയുടെ ആസ്തി വികസന ഫണ്ടിൽ നിന്നും 10.46 ലക്ഷം രൂപ വിനിയോഗിച്ചാണ് നിർമ്മാണ പ്രവർത്തനങ്ങൾ നടത്തുന്നത്. കുടിവെള്ള പദ്ധതിയുടെ നിർമ്മാണ ഉദ്ഘാടനം ബെന്നി ബെഹനാൻ എം പി നെടുങ്ങപ്രയിൽ നിർവഹിച്ചു.
35 കുടുംബങ്ങൾക്ക് കുടിവെള്ളം എത്തിക്കുന്നതിന് ടാങ്ക് നിർമ്മിക്കുന്ന പ്രവൃത്തിയാണ് ഇത്. 10 മീറ്റർ ഉയരത്തിൽ 10000 ലിറ്റർ സംഭരണ ശേഷിയുള്ള ടാങ്കാണ് ഇവിടെ സ്ഥാപിക്കുന്നത്. കുടിവെള്ള വിതരണത്തിനായി പൈപ്പ് ലൈൻ സ്ഥാപിക്കുന്ന പ്രവൃത്തി ഇതിനോടകം പൂർത്തീകരിച്ചു കഴിഞ്ഞു. കൂവപ്പടി ബ്ലോക്ക് പഞ്ചായത്തിൽ നിന്നും 5 ലക്ഷം രൂപ വിനിയോഗിച്ചാണ് പൈപ്പിടൽ പൂർത്തീകരിച്ചത്. ഗ്രാമ പഞ്ചായത്ത് ഫണ്ട് ഉപയോഗിച്ച് നിർമ്മിക്കുന്ന മോട്ടോർ ഷെഡ് അവസാന ഘട്ടത്തിലാണ്.
എൽദോസ് കുന്നപ്പിള്ളി എം.എൽ.എ അധ്യക്ഷത വഹിച്ച യോഗത്തിൽ ജില്ലാ പഞ്ചായത്ത് പ്രസിഡന്റ് മനോജ് മുത്തേടൻ, ജില്ലാ പഞ്ചായത്ത് അംഗം ഷൈമി വർഗീസ്, ബ്ലോക്ക് പഞ്ചായത്ത് അംഗം ഡെയ്സി ജെയിംസ്, സ്ഥിരം സമിതി അധ്യക്ഷ ഷീബ ചാക്കപ്പൻ, വാർഡ് അംഗം മരിയ സാജ് മാത്യു, പഞ്ചായത്ത് അംഗങ്ങളായ ആൻസി ജോബി, ബേസിൽ കോര, ശോഭന വിജയകുമാർ, ബിജു താണീയാട്ടുകുടി, നെടുങ്ങപ്ര സർവീസ് സഹകരണ ബാങ്ക് പ്രസിഡന്റ് സായി പുല്ലൻ, ഒ. ദേവസി, റോയ് പുതുശേരി തുടങ്ങിയവർ പങ്കെടുത്തു.
