രമേശ് ചെന്നിത്തലയുടെ വാര്‍ത്താസമ്മേളനത്തിനെതിരെ രൂക്ഷ വിമര്‍ശനവുമായി സിപിഎം സംസ്ഥാന സെക്രട്ടറിയേറ്റംഗം പി. രാജീവ്. തന്റെ ഭാഗം ന്യായീകരിച്ചുകൊണ്ട് ചെന്നിത്തല നടത്തിയ പത്രസമ്മേളനത്തിലെ പ്രസ്താവനകള്‍ക്കെതിരെയാണ് പി രാജീവ് വിമര്‍ശനവും പരിഹാസവുമടങ്ങിയ കുറിപ്പ് എഫ് ബിയില്‍ പോസ്റ്റ് ചെയ്തത്. പ്രോട്ടോക്കോള്‍ ബാധകമാക്കുന്നത് കോണ്‍സുലേറ്റിന്, ആരോ പറഞ്ഞതു കേട്ട് വിളിച്ചു പറഞ്ഞതോ?. തുടങ്ങി ജലീല്‍ പ്രോട്ടോക്കോള്‍ ലംഘനം നടത്തിയെന്ന ചെന്നിത്തലയുടെ പ്രസ്താവനയെ വിമര്‍ശിച്ചായിരുന്നു കുറിപ്പ്.
പി. രാജീവ് എഫ് ബി പോസ്റ്റ്:
പ്രോട്ടോക്കോള്‍ ബാധകമാക്കുന്നത് കോണ്‍സുലേറ്റിനാണെന്ന് ഉദ്ധരണികളോടെ ചെന്നിത്തല പത്ര സമ്മേളനത്തില്‍ പറയുന്നതു കേട്ടു. അപ്പോള്‍ ജലീല്‍ പ്രോട്ടോക്കോള്‍ ലംഘിച്ചെന്ന പഴയ പ്രസ്താവന ഏതു പുസ്തകത്തെ അടിസ്ഥാനമാക്കിയാണാവോ? അതോ ആരോ പറഞ്ഞതു കേട്ട് പഴയതുപോലെ വിളിച്ചു പറഞ്ഞതായിരുന്നോ? കോണ്‍സുലേറ്റിന്റ പരിപാടിയില്‍ പോയത് വിവാദമില്ലാത്ത കാലത്തായിരുന്നു എന്നതും ഇന്ന് അദ്ദേഹം സാക്ഷ്യപ്പെടുത്തിയിട്ടുണ്ട്. ജലീലും മറ്റും കോണ്‍സുലേറ്റില്‍ പോയത് ഏതു കാലത്താണാവോ? ഇന്നത്തെ പത്ര സമ്മേളനത്തോടെ പഴയ പത്രസമ്മേളനങ്ങളെല്ലാം റദ്ദാക്കി എന്നുകൂടി ചെന്നിത്തലക്ക് പറയാമായിരുന്നു.
