രാജീവ് ഗാന്ധി വധക്കേസിലെ മുഖ്യ പ്രതി നളിനി ആത്മഹത്യക്ക് ശ്രമിച്ചു. വെല്ലൂര്‍ വനിതാ ജയിലിലാണ് ആത്മഹത്യയ്ക്ക് ശ്രമിച്ചത്. ഇന്നലെ രാത്രിയായിരുന്നു സംഭവം. ഇന്ത്യാ ടുഡേയാണ് ഈ വാര്‍ത്ത റിപ്പോര്‍ട്ട് ചെയ്തത്. രാജീവ് ഗാന്ധിയെ കൊന്ന കേസില്‍ കഴിഞ്ഞ 29 വര്‍ഷമായി ജയിലിലാണ് നളിനി. നളിനിയും ജീവപര്യന്തം ശിക്ഷ അനുഭവിക്കുന്ന മറ്റൊരു തടവുകാരിയും തമ്മില്‍ വഴക്കുണ്ടായി. ഇക്കാര്യം തടവുകാരി ജയിലറെ അറിയിച്ചതിന് പിന്നാലെയാണ് നളിനി ആത്മഹത്യക്ക് ശ്രമിച്ചതെന്ന് അഭിഭാഷകന്‍ പറഞ്ഞു.
29 വര്‍ഷത്തെ ജയില്‍ ജീവിതത്തിനിടെ ആദ്യമായാണ് നളിനി ഇങ്ങനെ ചെയ്തതെന്ന് അഭിഭാഷകന്‍ പറഞ്ഞു. ഇതിനു മുമ്പ് ഇങ്ങനെ ഉണ്ടായിട്ടില്ല. എന്താണ് സംഭവിച്ചതെന്ന് അറിയേണ്ടതുണ്ട്. രാജീവ് വധക്കേസില്‍ ശിക്ഷ അനുഭവിക്കുന്ന നളിനിയുടെ ഭര്‍ത്താവ് മുരുകന്‍ നളിനിയെ ജയില്‍ മാറ്റണമെന്ന് ആവശ്യപ്പെട്ടിരുന്നു. വെല്ലൂരില്‍ നിന്ന് പുഴല്‍ ജയിലിലേക്ക് മാറ്റണമെന്നാണ് ആവശ്യപ്പെട്ടതെന്ന് അഭിഭാഷകന്‍ പറഞ്ഞു.
