ബെംഗളൂരു: കര്‍ണാടക മുഖ്യമന്ത്രിയായ കുമാരസ്വാമി ബുധനാഴ്ച സത്യപ്രതിജ്ഞ ചെയ്യും. ബെംഗളൂരിലെ കണ്ഠീരവ സ്റ്റേഡയത്തിലാണ് ചടങ്ങ് നടക്കുക. ബി.എസ് യെദ്യൂരപ്പ മുഖ്യമന്ത്രി പദം രാജിവെച്ചതിനു പിന്നാലെയാണ് മന്ത്രിസഭ രൂപികരിക്കാനുള്ള ആവകാശവാദം ഉന്നയിച്ച് ജെ.ഡി.എസ് നേതാവ് കുമാരസ്വാമി ഗവര്‍ണര്‍ വാജുബായ് വാലെയെ കണ്ടു.
തിങ്കളാഴ്ച സത്യപ്രതിജ്ഞ നടത്താനായിരുന്നു ആദ്യ തീരുമാനം. എന്നാല്‍ മെയ് 21 രാജീവ് ഗാന്ധിയുടെ ചരമദിനമായതിനാല്‍ സോണിയ ഗാന്ധിക്കും രാഹുല്‍ ഗാന്ധിക്കും പങ്കെടുക്കാനാവില്ലെന്ന് കോണ്‍ഗ്രസ് നേതാക്കള്‍ അറിയിച്ചു. തുടര്‍ന്നാണ് ബുധനാഴ്ചയിലേക്ക് മാറ്റിയത്.
രാത്രി രാജ്ഭവനില്‍ എത്തിയാണ് കോണ്‍ഗ്രസ്- ജെ.ഡി.എസ് സഖ്യത്തിന്റെ നിയുക്ത മുഖ്യമന്ത്രി കുമാരസ്വാമി ഗവണറെ കണ്ടത്.
കന്നഡയ്ക്ക് പെരിയവരായി കുമാരസ്വാമി. ഉപ മുഖ്യമന്ത്രി സ്ഥാനത്തെ ചൊല്ലി കോണ്‍ഗ്രസ്സില്‍ തര്‍ക്കം
അതേസമയം സത്യപ്രതിജ്ഞാ ചടങ്ങിന് കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധി, യുപിഎ അധ്യക്ഷ സോണിയാ ഗാന്ധി, ബംഗാള്‍ മുഖ്യമന്ത്രി മമതാ ബാനര്‍ജി, ബി.എസ്.പി മായാവതി, അഖിലേഷ് യാദവ് തുടങ്ങി പ്രമുഖര്‍ പങ്കെടുക്കും. ദേശീയതലത്തിലെ പ്രതിപക്ഷ നിരയിലെ എല്ലാവരെയും സത്യപ്രതിജ്ഞാ ചടങ്ങിന് ക്ഷണിക്കും. ഇതിലൂടെ ബി.ജെ.പിക്കെതിരെ ദേശീയ തലത്തില്‍ പ്രതിപക്ഷ നിരയില്‍ ശക്തമായ ഐക്യമുണ്ടാക്കാനാണ് കോണ്‍ഗ്രസിന്റെ ശ്രമം.
