=ശ്രീഹരിക്കോട്ടയില്‍ ഭീകരാക്രമണ ഭീഷണി. ഇതേതുടര്‍ന്ന് ഐഎസ്ആര്‍ഒ ബഹിരാകാശ നിലയത്തിന് കനത്ത സുരക്ഷ ഏര്‍പ്പെടുത്തി. തീരദേശ സേന, മറൈന്‍ പൊലീസ്, സിഐഎസ്എഫ് തുടങ്ങിയ സുരക്ഷാ സേനകളുടെ നേതൃത്വത്തിലാണ് പ്രദേശത്ത് കനത്ത സുരക്ഷയൊരുക്കിയത്.
കടലില്‍ 50 നോട്ടിക്കല്‍ മൈല്‍ ദൂരത്തില്‍ കര്‍ശന നിരീക്ഷണമേര്‍പ്പെടുത്തുകയും ചെയ്തു. മത്സ്യബന്ധന ബോട്ടുകളടക്കം നിരീക്ഷണത്തിലാണ്. രഹസ്യാന്വേഷണ ഏജന്‍സികള്‍ നല്‍കിയ വിവരത്തിന്റെ അടിസ്ഥാനത്തില്‍ പ്രദേശത്ത് കനത്ത ജാഗ്രതാ നിര്‍ദേശവും നല്‍കിയിട്ടുണ്ട്.
അതേസമയം, ശ്രീഹരിക്കോട്ടയ്ക്ക് സമീപമുള്ള വനമേഖലയില്‍ നിന്നും സംശയാസ്പദകരമായ സാഹചര്യത്തില്‍ രണ്ടു പേരെ കണ്ടെത്തി. ഇവരെ പൊലീസ് കസ്റ്റഡിയിലെടുത്ത് ചോദ്യം ചെയ്യുകയാണ്. ഇതുസംബന്ധിച്ച വിവരങ്ങള്‍ ലഭ്യമായി വരുന്നതേയുള്ളൂ. മുന്‍കരുതലിന്റെ ഭാഗമായി തിരുപ്പതി ക്ഷേത്രത്തിലും സുരക്ഷ ശക്തമാക്കിയിട്ടുണ്ട്.
