കിംസ് ആശുപത്രിയില്‍ ശസ്ത്രക്രിയയ്ക്കിടെ രോഗി മരിച്ച സംഭവത്തില്‍ സംസ്ഥാന വനിതാ കമ്മീഷന്‍ പോലീസ് മേധാവിയോട് റിപ്പോര്‍ട്ട് ആവശ്യപ്പെട്ടു. വനിതാ കമ്മീഷന്‍ അംഗം ഡോ. ഷാഹിദ കമാല്‍ ആണ് റിപ്പോര്‍ട്ട് ആവശ്യപ്പെട്ടത്. തിരുവനന്തപുരം നെടുമങ്ങാട് സ്വദേശിയായ സമീറാണ് വൃക്കയിലെ കല്ല് നീക്കം ചെയ്യുന്നതിനുള്ള ശസ്ത്രക്രിയക്കിടെ മരണപ്പെട്ടത്.
സമീറിന്റെ ഭാര്യ വനിതാ കമ്മീഷനില്‍ നല്‍കിയ പരാതിയുടെ അടിസ്ഥാനത്തിലാണ് റിപ്പോര്‍ട്ട് ആവശ്യപ്പെട്ടിരിക്കുന്നത്. വൃക്കയിലെ കല്ല് നീക്കം ചെയ്യുന്നതിന് നേരത്തേ രണ്ട് തവണ സമീര്‍ ഇതേ ആശുപത്രിയില്‍ ശസ്ത്രക്രിയക്ക് വിധേയനായിട്ടുണ്ട്. വൃക്കയില്‍ കല്ലുകള്‍ വീണ്ടും കാണപ്പെട്ടതിനാല്‍ മൂന്നാമതും ശസ്ത്രക്രിയ നടത്തുകയായിരുന്നു.
എന്നാല്‍, മൂന്നാമത്തെ ശസ്ത്രക്രിയക്കിടെ സമീര്‍ മരിച്ചു എന്നാണ് ആശുപത്രി അധികൃതര്‍ അറിയിച്ചതെന്നും പോസ്റ്റ്‌മോര്‍ട്ടം റിപ്പോര്‍ട്ട് ഉള്‍പ്പെടെ കാണിച്ച് പരാതി നല്‍കിയിട്ടും കഴക്കൂട്ടം അസിസ്റ്റന്റ് പോലീസ് കമ്മീഷണര്‍ വേണ്ട നടപടി സ്വീകരിക്കുന്നില്ലെന്നും പരാതിയില്‍ വ്യക്തമാക്കുന്നു. ഇക്കാര്യം ചൂണ്ടികാട്ടി പരാതിക്കാരി ഡി.ജി.പി ക്കും പരാതി നല്‍കിയിട്ടുണ്ട്, ഭര്‍ത്താവ് മരിച്ച സംഭവം ക്രൈംബ്രാഞ്ച് അന്വേഷിക്കണമെന്നും പരാതിക്കാരി ആവശ്യം ഉന്നയിച്ചിട്ടുണ്ട്. ഇതിനെ തുടര്‍ന്നാണ് വനിതാ കമ്മീഷന്‍ ഡിജിപിയോട് റിപ്പോര്‍ട്ട് ആവശ്യപ്പെട്ടതെന്ന് ഡോ. ഷാഹിദ കമാല്‍ അറിയിച്ചു.
