പത്തനംതിട്ട : മകരവിളക്ക് മഹോത്സവത്തിനായി ശബരിമല നട തുറന്നു. വൈകിട്ട് അഞ്ചോടെ മേല്‍ശാന്തി പി എന്‍ മഹേഷാണ് നട തുറന്നത്. ജനുവരി 15നാണ് മകരവിളക്ക്. ഇന്ന് ഉച്ചമുതലാണ് തീര്‍ഥാടകര്‍ക്ക് പമ്പയില്‍ നിന്ന് പ്രവേശനമനുവദിച്ചത്.
യോഗദണ്ഡും രുദ്രാക്ഷമാലയും അണിയിച്ച് ഭസ്മവിഭൂഷിതനായി യോഗനിദ്രയിലുള്ള അയ്യപ്പനെ ഉണര്‍ത്തിയതോടെ മകരവിളക്ക് മകരവിളക്ക് മഹോത്സവത്തിന് തുടക്കം.
തന്ത്രി കണ്ഠര് മഹേഷ് മോഹനരുടെ കാര്‍മികത്വത്തില്‍ മേല്‍ശാന്തി പി എന്‍ മഹേഷാണ് നട തുറന്നത്. തുടര്‍ന്ന് മേല്‍ശാന്തി പതിനെട്ടാം പടിയിറങ്ങി ആഴിയില്‍ അഗ്‌നി പകര്‍ന്നു. ഇതിന് ശേഷമായിരുന്നു തീര്‍ഥാടകര്‍ക്ക് ദര്‍ശനമനുവദിച്ചത്.
ആര്‍ ആനന്ദ് ഐപിഎസിന്റെ നേതൃത്വത്തിലുള്ള 1800 പൊലീസുകാരുടെ പുതിയ ബാച്ച് ഇന്ന് രാവിലെയാണ് ചുമതലയേറ്റെടുത്തത് മണ്ഡല കാലത്തിന്റെ ആദ്യഘട്ടത്തില്‍ ഉണ്ടായ പിഴവുകള്‍ പരിഹരിച്ച് തീര്‍ഥാടകര്‍ക്ക് സുഗമമായ ദര്‍ശനം ഒരുക്കാനുള്ള തയ്യാറെടുപ്പിലാണ് പൊലീസും ദേവസ്വം ബോര്‍ഡും. നട തുറക്കുന്ന ദിവസമായതിനാല്‍ വേര്‍ച്വല്‍ ക്യൂ വഴിയുള്ള ബുക്കിംഗ് 26,000മായി കുറച്ചിട്ടുണ്ട്.
