തിരൂര്‍: മലപ്പുറത്ത് വിവധയിടങ്ങളില്‍ ദേശീയ അന്വേഷണ ഏജന്‍സിയുടെ (എന്‍.ഐ.എ.) പരിശോധന. വേങ്ങര, തിരൂര്‍, താനൂര്‍, രാങ്ങാട്ടൂര്‍ എന്നിവിടങ്ങളിലാണ് പരിശോധന. നിരോധിത സംഘടനയായ പോപ്പുലര്‍ ഫ്രണ്ടില്‍ പ്രവര്‍ത്തിച്ചവരുടെ വീടുകളിലാണ് പരിശോധന നടന്നത്. പുലര്‍ച്ചെ തുടങ്ങിയ പരിശോധന തുടരുകയാണ്.
വേങ്ങര പറമ്പില്‍പ്പടി തയ്യില്‍ ഹംസ, തിരൂര്‍ ആലത്തിയൂര്‍ കളത്തിപ്പറമ്പില്‍ യാഹുട്ടി, താനൂര്‍ നിറമരുതൂര്‍ ചോലയില്‍ ഹനീഫ, രാങ്ങാട്ടൂര്‍ പടിക്കാപ്പറമ്പില്‍ ജാഫര്‍ എന്നിവരുടെ വീടുകളിലാണ് പരിശോധന. ഒരേ സമയത്ത് നാലു പേരുടെ വീടുകളിലും എന്‍.ഐ.എ. സംഘം ഒരേസമയത്താണ് പരിശോധന തുടങ്ങിയത്.
സംഘടന നിരോധിച്ചതിനു പിന്നാലെ രാജ്യവ്യാപകമായി പി.എഫ്.ഐ. കേന്ദ്രങ്ങളില്‍ എന്‍.ഐ.എ. പരിശോധന നടത്തി വരികയായിരുന്നു. അതിന്റെ തുടര്‍ച്ചയാണ് ജില്ലയില്‍ നടന്ന പരിശോധനയും. നേരത്തെ മഞ്ചേരിയിലെ ഗ്രീന്‍വാലി അക്കാദമി, മൂന്നാര്‍ വില്ല വിസ്ത’ പ്രൈവറ്റ് ലിമിറ്റഡ് റിസോര്‍ട്ട്, ട്രിവാന്‍ഡ്രം എജ്യുക്കേഷന്‍ ആന്‍ഡ് സര്‍വീസ് ട്രസ്റ്റ്, വള്ളുവനാട് ഹൗസ് തുടങ്ങിയവ പി.എഫ്.ഐയുടെ പരിശീലനകേന്ദ്രങ്ങളായി പ്രവര്‍ത്തിക്കുന്നു എന്ന കണ്ടെത്തിയതിനെ തുടര്‍ന്ന് എന്‍.ഐ.എ. കണ്ടുകെട്ടിയിരുന്നു.
കേരളത്തില്‍ നിന്നുള്ള നേതാക്കളടക്കം ഇതുവരെ 200-ലധികം പേരാണ് രാജ്യവ്യാപകമായി എന്‍.ഐ.എയും ഇ.ഡിയും നടത്തിയ പരിശോധനയില്‍ അറസ്റ്റിലായത്.
