കണ്ണൂര്‍: എലത്തൂര്‍ തീവെയ്പ്പ് കേസിലെ നടുക്കം മാറുന്നതിന് മുന്‍പെ റെയില്‍വെ സ്റ്റേഷനില്‍ നിര്‍യിട്ട അതേ ട്രെയിനിന് തീപിടിച്ചു. പുലര്‍ച്ചെ ഒന്നരയോടെ ആലപ്പുഴ – കണ്ണൂര്‍ എക്‌സിക്യൂട്ടീവ് എക്‌സ്പ്രസിനാണ് തീപിടിച്ചത്. ഒരു ബോഗി പൂര്‍ണമായും കത്തിനശിച്ചു. ബോധപൂര്‍വം തീയിട്ടതാകാം എന്ന് തന്നെയാണ് പോലീസിന്റെ പ്രാഥമിക നിഗമനം. അട്ടിമറി സാധ്യത റെയില്‍വെ തള്ളിക്കളയുന്നില്ല.
ഇന്നലെ സര്‍വീസ് പൂര്‍ത്തിയായതിന് ശേഷം കണ്ണൂര്‍ റെയില്‍വെ സ്റ്റേഷനില്‍ നിര്‍ത്തിയിട്ടിരിക്കുകയായിരുന്നു ട്രെയിന്‍. മൂന്നാം പ്ലാറ്റ്ഫോമിന് സമീപം എട്ടാമത്തെ യാര്‍ഡിലായിരുന്നു ട്രെയിന്‍ ഉണ്ടായിരുന്നത്. പിറകില്‍ നിന്ന് മൂന്നാമത്തെ ബോഗി പൂര്‍ണമായും കത്തി നശിച്ചു. സമീപത്ത് നിന്ന് ലഭിച്ച സിസിടിവി ദൃശ്യങ്ങളില്‍ ഒരാള്‍ കാനുമായി എത്തുന്നത് വ്യക്തമാകുന്നുണ്ട്. മറ്റ് വിവരങ്ങള്‍ ഒന്നും ലഭ്യമായിട്ടില്ല.
അഗ്നി ശമനസേനയുടെ മൂന്ന് യൂണിറ്റ് ഉടനെ സ്ഥലത്തെത്തി തീയണച്ചു. മണിക്കൂറുകള്‍ക്കകം തീ പൂര്‍ണമായും അണയ്ക്കാനായി. തീയും പുകയും ഉയര്‍ന്നതു കണ്ട് ജീവനക്കാരാണ് അധികൃതരെ വിവരമറിയിച്ചത്. നിര്‍ത്തിയിട്ട ട്രെയിനായതിനാല്‍ ആളപായമോ മറ്റ് അപകടങ്ങളോ സംഭവിച്ചിട്ടില്ല.
