ന്യൂഡല്‍ഹി: പ്രളയവും കാലാവസ്ഥ വ്യതിയാനവും നിമിത്തം ഉല്‍പാദന തകര്‍ച്ച നേരിടുന്ന ഇടുക്കി ജില്ലയിലെ ഏലം കൃഷിയെ സമഗ്രമായി പുനരുദ്ധരിക്കുനത്തിന് ഏലം ക്ലസ്റ്റര്‍ ആയി പ്രഖ്യാപിക്കുമെന്നു കേന്ദ്ര വാണിജ്യ മന്ത്രി പിയുഷ് ഗോയല്‍ അറിയിച്ചതായി ഡീന്‍ കുര്യാക്കോസ് എംപി പറഞ്ഞു. കഴിഞ്ഞ പാര്‍ലമെന്റ് സമ്മേളനത്തില്‍ ഉന്നയിച്ച ചോദ്യത്തിന് മറുപടിയായാണ് മന്ത്രി ഇക്കാര്യം അറിയിച്ചത്. ഉത്പാദനം, വിപണനം, വിലസ്ഥിരത എന്നിയ്ക്കായി സമഗ്ര പദ്ധതിയാണ് ക്ലസ്റ്ററിലൂടെ നടപ്പാക്കുന്നത്. ഇപ്പോള്‍ ഏലത്തിനു മെച്ചപ്പെട്ട വില ലഭിക്കുന്നുണ്ടെങ്കിലും ഉല്‍പാദന ക്ഷമത കുറഞ്ഞു വരുന്നു. വില നിലനിര്‍ത്താന്‍ കാര്യക്ഷമമായ നടപടികള്‍ സ്വീകരിക്കണമെന്നും ഇറക്കുമതി തീരുവ വര്‍പ്പിക്കണമെന്നും വിദേശ രാജ്യങ്ങളില്‍ നിന്നും കള്ളക്കടത്തായി ഏലം ഇന്‍ഡ്യയില്‍ എത്തിച്ചേരുന്നത് തടയുന്നതിന് സത്വര നടപടി സ്വീകരിക്കനമെന്നും കേന്ദ്രത്തോട് ആവശ്യപ്പെട്ടിട്ടുണ്ടെന്നും എംപി അറിയിച്ചു.
