തൊടുപുഴ: കാനഡയില്‍ വച്ച് തടാകത്തില്‍ വീണ് മരണമടഞ്ഞ വണ്ണപ്പുറം സ്വദേശി എബിന്‍ സന്തോഷിന്റെ (21 വയസ്) മൃതദേഹം ഒരാഴ്ചക്കുള്ളില്‍ നാട്ടിലെത്തിക്കാമെന്ന് പ്രതീക്ഷിക്കുന്നതായി കാനഡയില്‍ നിന്നുള്ള ഇന്‍ഡ്യന്‍ അംബാസിഡര്‍ അജയ് ബിസ്സാരിയ അറിയിച്ചതായി ഡീന്‍ കുര്യാക്കോസ് എം.പി. കോവിഡ് നിയന്ത്രണങ്ങളെത്തുടര്‍ന്ന് ഔദ്ദ്യോഗിക നടപടികൃമങ്ങള്‍ പൂര്‍ത്തീകരിക്കുന്നതിന് വരുന്ന താമസമാണ് മൃതദേഹം നാട്ടിലെത്തിക്കുന്നതിന് താമസം നേരിടുന്നതെന്നും കുടുംബാഗങ്ങളുടെയും സുഹൃത്തുക്കളുടെയും ദുഖത്തില്‍ പങ്കുചേരുന്നതായും ഹൈക്കമ്മീഷണര്‍ ഡീന്‍ കുര്യാക്കോസ് എംപിയ്ക്ക് അയച്ച കത്തില്‍ പറഞ്ഞു.
കാനഡയില്‍ ഒന്റാറിയോയില്‍ ജോര്‍ജ്ജിയന്‍ കോളേജില്‍ ബിരുദ വിദ്യാര്‍ത്ഥിയായിരുന്നു മരിച്ച എബിന്‍ സന്തോഷ്. മൃതദേഹം നാട്ടിലെത്തിക്കുന്നതുമായി ബന്ധപ്പെട്ട് കഴിഞ്ഞ ദിവസം ഹൈക്കമ്മീഷണര്‍ അജയ് ബിസ്സാരിയ്ക്ക് കത്ത് നല്‍കുകയും ഫോണില്‍ സംസാരിക്കുകയും ചെയ്തിരുന്നു എം.പി. എബിന്‍ സന്തോഷിന്റെ കുടുംബത്തിന്റെ നിര്‍ദ്ദേശപ്രകാരം ഫാ. ജോര്‍ജ്ജ് വടക്കന്‍, ഫാ. ബോബി ജോയി എന്നീ വൈദികരും എബിന്റെ സൂഹൃത്തായ അനലും ഹൈക്കമ്മീഷനുമായി ബന്ധപ്പെട്ട് പ്രവര്‍ത്തനങ്ങള്‍ ഏകോപിക്കുന്നതായും എം.പി. അറിയിച്ചു. വണ്ണപ്പുറം പറയ്ക്കനാല്‍ സന്തോഷിന്റെയും മുന്‍ പഞ്ചായത്ത് അംഗം ഷൈനി സന്തോഷിന്റെയും രണ്ടാമത്തെ മകനാണ് എബിന്‍ സന്തോഷ്. സഹോദരങ്ങള്‍ ആല്‍വിന്‍, ബിവിന്‍, സെലിന്‍ മരിയ എന്നിവരാണ്.
