മൂന്നാര്‍: മൂന്നാറില്‍ വീണ്ടും പടയപ്പ ജനവാസ മേഖലയില്‍ ഇറങ്ങി ആക്രമണം അഴിച്ചുവിട്ടു കടലാര്‍ പ്രദേശത്ത് ഇന്നലെ രാത്രി എത്തിയ കൊമ്പന്‍ പ്രദേശത്തെ റേഷന്‍കട തകര്‍ക്കുകയും ചെയ്തു. അതിനിടെ ചൊക്കനാട് മേഖലയിലും കാട്ടാന ആക്രമണം ഉണ്ടായി. കൂട്ടമായി ഇറങ്ങിയ കാട്ടാനകള്‍ പ്രദേശത്തെ ക്ഷേത്രത്തിന് കേടുപാടുകള്‍ വരുത്തി.
കാടു കയറാന്‍ കൂട്ടാക്കാതെ ജനവാസ മേഖലകളില്‍ തമ്പടിച്ചിട്ടുള്ള കാട്ടാനകള്‍ ആളുകളുടെ ഉറക്കം കെടുത്തുന്നുണ്ട്. രാത്രിയാവുന്നതോടെ പ്രദേശവാസികള്‍ ഭീതിയോടെയാണ് പുറത്തിറങ്ങുന്നത്.
പടയപ്പയ്ക്ക് മദപ്പാടുളളതിനാല്‍ പ്രകോപിപ്പിക്കരുതെന്ന് വനംവകുപ്പ് നേരത്തെ മുന്നറിയിപ്പ് നല്‍കിയിരുന്നു. മദപ്പാടുളള സമയത്ത് സാധാരണയായി പടയപ്പ കാടു കയറുകയാണ് പതിവ്. എന്നാല്‍ കഴിഞ്ഞ രണ്ടുവര്‍ഷമായി മദപ്പാടുളള സമയത്തും ജനവാസ മേഖലയില്‍ തന്നെ തുടരുകയാണ് പടയപ്പ. ആനയെ പ്രകോപിതനാവാതിരിക്കാന്‍ നാട്ടുകാരും സഞ്ചാരികളും ജാഗ്രത പുലര്‍ത്തണമെന്ന് വനംവകുപ്പ് നിര്‍ദേശം നല്‍കിയിട്ടുണ്ട്.
