മൂവാറ്റുപുഴ മാറാടി ഗ്രാമപഞ്ചായത്ത് മൂന്നാം വാര്‍ഡില്‍ നിര്‍മിച്ച കുടിവെള്ള പദ്ധതിയുടെ ഉദ്ഘാടനം എല്‍ദോ എബ്രഹാം എം.എല്‍.എ നിര്‍വ്വഹിച്ചു. കരോട്ട്കുന്നേല്‍ ഭാഗം പഞ്ചായത്ത് ഓഫീസിന്റെ കുടിവെള്ള പദ്ധതിയാണ് നിര്‍മ്മിക്കുന്നത്. പഞ്ചായത്ത് പ്രസിഡന്റ് ലത ശിവന്‍ അധ്യക്ഷത വഹിച്ചു. ജില്ലാ പഞ്ചായത്ത് മെമ്പര്‍ എന്‍.അരുണ്‍ മുഖ്യപ്രഭാഷണം നടത്തി.
പഞ്ചായത്ത് വൈസ്പ്രസിഡന്റ് കെ.യു.ബേബി, ബ്ലോക്ക് പഞ്ചായത്ത് മെമ്പര്‍മാരായ ഒ.പി.ബേബി, ഒ.സി.ഏലിയാസ്, പഞ്ചായത്ത് സ്റ്റാന്റിംഗ് കമ്മിറ്റി ചെയര്‍മാന്‍മാരായ കെ.എസ്.മുരളി, വത്സല ബിന്ദുകുട്ടന്‍, രമ രാമകൃഷ്ണന്‍, വിവിധ കക്ഷിനേതാക്കളായ എം.പി.ലാല്‍, എം.എന്‍.മുരളി, പോള്‍ പൂമറ്റം, പഞ്ചായത്ത് മെമ്പര്‍മാര്‍, കുടുംബശ്രീ അംഗങ്ങള്‍ സംമ്പന്ധിച്ചു. പഞ്ചായത്തില്‍ നിന്നും അനുവദിച്ച 10 ലക്ഷം രൂപ മുതല്‍ മുടക്കിയാണ് കുടിവെള്ള പദ്ധതിയുടെ നിര്‍മ്മാണം പൂര്‍ത്തിയായത്.
മണ്ണത്തൂര്‍ കവലയിലുള്ള പഞ്ചായത്ത് കിണറില്‍ നിന്നും വെള്ളം പമ്പ് ചെയ്ത് പഞ്ചായത്ത് ഓഫീസിന് സമീപത്തുള്ള ഉയര്‍ന്ന പ്രദേശത്ത് സ്ഥാപിച്ച ടാങ്കില്‍ വെള്ളമെത്തിച്ച് വിതരണം ചെയ്യുന്നതാണ് പദ്ധതി. 25-ഓളം കുടുംബങ്ങള്‍ക്കും പഞ്ചായത്ത് ഓഫീസ് അടക്കമുള്ള ഓഫീസിലേയ്ക്കും സുഗമമായി കുടിവെള്ളമെത്തിക്കുന്നതിനും പദ്ധതി ലക്ഷ്യമിടുന്നത്. നിലവില്‍ പ്രദേശത്ത് വാട്ടര്‍ അതോറിറ്റിയുടെ കുടിവെള്ളമാണ് ഉപയോഗിക്കുന്നത്. പദ്ധതി യാഥാര്‍ത്ഥ്യമായതോടെ പ്രദേശത്ത് അടിയ്ക്കടി കുടിവെള്ളം മുടങ്ങുന്നതിന് പരിഹാരമായി.
