വീട്ടില്‍ പഠിക്കാന്‍ സൗകര്യങ്ങള്‍ ഇല്ലാത്തതിനാല്‍ പഠനോപകരണങ്ങളും മൊബൈല്‍ ഫോണും നല്‍കണമെന്ന അഭ്യര്‍ത്ഥനയുമായാണ് അദാലത്ത് വേദിയില്‍ മന്ത്രിയെ കാണാന്‍ ദിയാ മോള്‍ ഷെറിന്‍ എത്തിയത്. ഏഴാം ക്ലാസുകാരിയായ ദിയാമോളുടെ പരാതി പരിഗണിച്ച മന്ത്രി പി. രാജീവ് ആവശ്യമായ നടപടി സ്വീകരിക്കാമെന്നും കുറച്ചുനേരം കാത്തിരിക്കാനും പറഞ്ഞു.
തുടര്‍ന്ന് ആനിക്കാട് സര്‍വീസ് സഹകരണ ബാങ്കിന്റെ നേതൃത്വത്തില്‍ പഠന മേശ, കസേര, ബാഗ്, കുട എന്നിവയും മൂവാറ്റുപുഴ നഗരസഭ മുന്‍ ചെയര്‍പേഴ്‌സണ്‍ മേരി ജോര്‍ജ് തോട്ടത്തില്‍ എല്‍.ഇ.ഡി. ടി.വി യും അദാലത്ത് വേദിയില്‍ എത്തിക്കുകയായിരുന്നു. ഇത് ദിയ മോള്‍ക്ക് മന്ത്രി പി. പ്രസാദിന്റെ സാന്നിധ്യത്തില്‍ മന്ത്രി പി.രാജീവ് സമ്മാനിച്ചു.
രണ്ടാര്‍ക്കര രാജീവ് ഗാന്ധി കോളനി നിവാസിയായ ദിയാമോള്‍ ഷെറിന്റെ ഉപ്പയുടെ ഉമ്മ റംല ഹമീദ് സിവില്‍ സ്റ്റേഷനില്‍ അപേക്ഷ എഴുതി നല്‍കുന്ന തൊഴിലാണ് ചെയ്യുന്നത്. സമയം കിട്ടുമ്പോഴെല്ലാം സിവില്‍ സ്റ്റേഷനില്‍ എത്തി വല്യുമ്മയെ അപേക്ഷ എഴുതാന്‍ സഹായിക്കാറുണ്ട് ഈ കൊച്ചുമിടുക്കി. കിഴക്കേക്കര ഗവ. ഈസ്റ്റ് ഹൈസ്‌കൂളിലെ ഏഴാം ക്ലാസ്സ് വിദ്യാര്‍ത്ഥിനിയായ ദിയാമോളും കുടുംബവും ഈ വരുമാനത്തിലാണ് ജീവിക്കുന്നത്. അതിനാല്‍ മെച്ചപ്പെട്ട പഠന സൗകര്യം ദിയാമോള്‍ക്ക് നല്‍കാന്‍ കുടുംബത്തിന് കഴിഞ്ഞിരുന്നില്ല. വല്ല്യുമ്മയോടൊപ്പം കരുതലും കൈത്താങ്ങും മൂവാറ്റുപുഴ താലൂക്ക് തല അദാലത്ത് വേദിയിലെത്തി മന്ത്രി പി. രാജീവിനെ കണ്ടു. തന്റെ സാമ്പത്തിക സ്ഥിതിയും ബുദ്ധിമുട്ടും മന്ത്രിയെ അറിയിച്ചു. അനിയന്‍ ദില്‍ഷാന്‍ ഷെറിന്‍, അമ്മ ഷെമിന ഷെറിന്‍ എന്നിവര്‍ക്കൊപ്പമാണ് ദിയ എത്തിയത്. അനിയന്‍ ദില്‍ഷാനും കുടയും ബാഗും നല്‍കാന്‍ മന്ത്രി നിര്‍ദേശിച്ചു. ഇരുവര്‍ക്കും നന്നായി പഠിച്ച് മികച്ച വിജയം നേടാന്‍ കഴിയട്ടെ എന്ന് മന്ത്രി ആശംസിച്ചു.
