പെരുമ്പാവൂര്‍ : ചേരാനല്ലൂര്‍ ആയുര്‍വേദ ആശുപത്രിയില്‍ അനുവദിച്ച പുതിയ കെട്ടിടത്തിന്റെ നിര്‍മ്മാണം പുരോഗമിക്കുന്നതായി എല്‍ദോസ് കുന്നപ്പിള്ളി എം.എല്‍.എ അറിയിച്ചു. തെരഞ്ഞെടുപ്പ് പെരുമാറ്റചട്ടം മൂലം താല്‍ക്കാലകമായി നിര്‍ത്തിവെച്ചിരുന്നെങ്കിലും വീണ്ടും ആരംഭിക്കുകയായിരുന്നു. പൊതുമേഖല സ്ഥാപനമായ കെല്ലിന് വേണ്ടി സാജ് കണ്‍സ്ട്രക്ഷന്‍സ് ആണ് നിര്‍മ്മാണം.
കഴിഞ്ഞ വര്‍ഷത്തെ എം.എല്‍.എ
ആസ്തി വികസന ഫണ്ടില്‍ നിന്ന് 56.06 ലക്ഷം രൂപ വിനിയോഗിച്ചാണ് പുതിയ കെട്ടിടം നിര്‍മ്മിക്കുന്നത്. മുന്‍പ് ഇവിടെ കെട്ടിടം നിര്‍മ്മിക്കുന്നതിനായി തുക അനുവദിച്ചിരുന്നെങ്കിലും ആശുപത്രിയുടെ സൗകര്യങ്ങളില്‍ മാറ്റം വരുത്തേണ്ടി വന്നതിനാല്‍ പുതിയ ഭരണാനുമതി ലഭ്യമാക്കുകയായിരുന്നു. എല്‍ദോസ് കുന്നപ്പിള്ളി എം.എല്‍.എ നിയോജക മണ്ഡലത്തിലെ ആരോഗ്യ മേഖലയില്‍ നടപ്പിലാക്കുന്ന ആരോഗ്യ പെരുമ്പാവൂര്‍ പദ്ധതിയുടെ ഭാഗമായാണ് വിശദമായ പദ്ധതി റിപ്പോര്‍ട്ട് തയ്യാറാക്കിയത്.
2300 ചതുരശ്രയടി ചുറ്റളവിലാണ് കെട്ടിടം നിര്‍മ്മിക്കുന്നത്. ഭാവിയില്‍ മറ്റു രണ്ട് നിലകള്‍ കൂടി നിര്‍മ്മിക്കുന്നതിനുള്ള അടിത്തറയോടു കൂടിയാണ് കെട്ടിടം വിഭാവനം ചെയ്തിരിക്കുന്നത്. 2 കണ്‍സള്‍ട്ടിംഗ് മുറികള്‍, ആയുര്‍വേദ ഫാര്‍മസി, നേഴ്സസ് സ്റ്റേഷന്‍, ട്രീറ്റ്മെന്റ് മുറി, പഞ്ചകര്‍മ ട്രീറ്റ്മെന്റ് മുറി, ഡ്രസ്സിംഗ് മുറി, വനിതകള്‍ക്കും പുരുഷന്മാര്‍ക്കും പ്രത്യേകം ശുചിമുറികള്‍, റിസപ്ഷന്‍ എന്നിവ കൂടാതെ ഭാവിയില്‍ മറ്റു നിലകള്‍ നിര്‍മ്മിക്കുമ്പോള്‍ ലിഫ്റ്റ് ഉപയോഗത്തിനുള്ള സൗകര്യവും പദ്ധതിയില്‍ ഉള്‍ക്കൊള്ളിച്ചിട്ടുണ്ട്.
65 വര്‍ഷം പിന്നിട്ട ആശുപത്രിക്കായി പഞ്ചായത്ത് 1997 ല്‍ സ്വന്തമായി സ്ഥലം വാങ്ങിയിരുന്നു. ദിനം പ്രതി ഇരുനൂറ്റിയന്‍പതോളം രോഗികള്‍ ചികിത്സയ്ക്കായി ഇവിടെ എത്തുന്നുണ്ട്. മങ്കുഴി, തൊട്ടുവ, ഇടവൂര്‍ പ്രദേശങ്ങളിലെ ഏറെയും ജനങ്ങള്‍ ആയുര്‍വേദ ചികിത്സയ്ക്കായി ആശ്രയിക്കുന്നത് ഇവിടെയാണ്. ഒരു ഡോക്ടര്‍ ഉള്‍പ്പെടെ 6 സ്റ്റാഫുകളാണ് ആശുപത്രിയില്‍ സേവനം അനുഷ്ഠിക്കുന്നത്. കൂവപ്പടി ഗ്രാമ പഞ്ചായത്തിന് കീഴിലുള്ള ചേരാനല്ലൂര്‍ ഗവ. ആയുര്‍വേദ ആശുപത്രിയെ വയോജനങ്ങളാണ് കൂടുതലും ആശ്രയിക്കുന്നത്.
