എറണാകുളം: ജില്ലയിലെ മികച്ച എന്‍.എസ് എസ് പ്രോഗ്രാം ഓഫീസര്‍ക്കുള്ള ജില്ലാ പഞ്ചായത്തിന്റെ പ്രസിഡന്റ്‌സ് എക്‌സലന്‍സ് അവാര്‍ഡ് സമീര്‍ സിദ്ദീഖിയ്ക്ക്. ഇരിങ്ങോള്‍ സര്‍ക്കാര്‍ വി.എച്ച്.എസ് സ്‌കൂളിലെ വി.എച്ച്. എസ് ഇ വിഭാഗം അധ്യാപകനും നാഷണല്‍ സര്‍വ്വീസ് സ്‌കീം പ്രോഗ്രാം ഓഫീസറുമാണ്‌സമീര്‍ സിദ്ദീഖ. എറണാകുളം ജില്ലാപഞ്ചായത്തില്‍ വച്ചു നടന്ന ചടങ്ങില്‍ മുന്‍ ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ് സര്‍ട്ടിഫിക്കറ്റും ഫലകവും നല്‍കി ആദരിച്ചു.
പാഠ്യ പാഠ്യേതര വിഷയങ്ങളില്‍ സജീവമായി ഇടപ്പെട്ട് സ്‌കൂളിലും പൊതുസ്ഥലങ്ങളിലും നടത്തിയ മികച്ചതും വേറിട്ടതും മാതൃകാ പ്രവര്‍ത്തനങ്ങള്‍ വിലയിരുത്തിയാണ് ഈ പുരസ്‌കാരം നല്‍കിയത്. 2021 – 22 ല്‍ മൂവാറ്റുപുഴ ഈസ്റ്റ് മാറാടി സ്‌കൂളിലെ പ്രവര്‍ത്തനങ്ങള്‍ വിലയിരുത്തി സംസ്ഥാന സര്‍ക്കാരിന്റെ മികച്ച എന്‍.എസ് എസ് പ്രോഗ്രാം ഓഫീസര്‍ക്കുള്ള സംസ്ഥാന തല അവാര്‍ഡും ഇദ്ദേഹത്തിന് ലഭിച്ചിട്ടുണ്ട്.
വിദ്യാഭ്യാസ മേഖലയിലെ മികവിനുള്ള ഗിജുഭായ് ദേശീയ അദ്ധ്യാപക അവാര്‍ഡ് ഗുജറാത്തിലെ ദിസ താലൂക്കിലെ ഗോഗധാനി പ്രൈമറി സ്‌കൂള്‍ അക്കാഡമി കേരളയും മന്‍ന്തന്‍ ഗുജറാത്ത് ടീമും ചേര്‍ന്ന് നല്‍കിയിട്ടുണ്ട്. വി.എച്ച് എസ് ഇ അധ്യാപകരുടെ സംഘടനയായ ആള്‍ കേരള വി.എച്ച്.എസ്.വി.ഐ അസോസിയേഷന്‍ സംസ്ഥാന പ്രസിഡന്റുമാണ്. നന്മമരം ഗ്ലോബല്‍ ഫൗണ്ടേഷന്റെ പരിസ്ഥിതി വിഭാഗത്തിന്റെ സംസ്ഥാന കോര്‍ഡിനേറ്ററുമാണ്.
തിരുവനന്തപുരം ആര്യനാട് സ്വദേശിയും റിട്ടയേര്‍ഡ് കോളേജ് അദ്ധ്യാപകനുമായ ഡോ എം സിദ്ദീക്കുല്‍ കബീറിന്റെയും ഷാജാതി ബീഗത്തിന്റെയും മകനാണ്. ദി കേക്ക് ഗേള്‍ ഹോം ബേക്കറായ തസ്‌നിം സമീറും ഇരിങ്ങോള്‍ സ്‌കൂളിലെ ആറാം ക്ലാസുകാരനും ബലൂണ്‍ ആര്‍ട്ടിസ്റ്റുമായ റൈഹാന്‍ സമീറും ഇരിങ്ങോളിലാണ് താമസം.
