കാക്കനാട് : സ്വകാര്യ ബസിലെ തര്‍ക്കത്തിനിടയില്‍ മോശമായി പെരുമാറിയത് ചോദ്യംചെയ്ത വിദ്യാര്‍ഥിയെ കണ്ടക്ടര്‍ മര്‍ദിക്കുകയും കടിച്ച് പരിക്കേല്‍പിക്കുകയും ചെയ്തതായി പരാതി.
നെഞ്ചില്‍ പരിക്കേറ്റ ഇടപ്പള്ളി സെന്റ് ജോര്‍ജ് സ്‌കൂളിലെ പത്താം ക്ലാസ് വിദ്യാര്‍ഥി കങ്ങരപ്പടി സ്വദേശി വി.ജെ.കൃഷ്ണജിത്ത് തൃക്കാക്കര സഹകരണ ആശുപത്രിയില്‍ ചികിത്സ തേടി.
വ്യാഴാഴ്ച വൈകുന്നേരം ഇടപ്പള്ളിയിലാണ് സംഭവം. സ്‌കൂളില്‍ നിന്നും വീട്ടിലേക്ക് പോകാന്‍ പുക്കാട്ടുപടി റൂട്ടിലോടുന്ന ‘മദീന’ ബസിലാണ് കയറിയത്. യാത്രക്കിടെ ബസ് കണ്ടക്ടര്‍ മാറിനില്‍ക്കാന്‍ പറഞ്ഞ് ദേഹത്ത് പിടിച്ച് തള്ളി.
പിന്നീട് തൃക്കാക്കര ജഡ്ജിമുക്ക് ഭാഗത്തെത്തിയപ്പോള്‍ വീണ്ടും തള്ളിമാറ്റി. ഇവിടെ നിന്നാല്‍ പോരേ എന്നു ചോദിച്ചതാണ് കണ്ടക്ടറെ പ്രകോപിപ്പിച്ചതെന്നാണ് കൃഷ്ണജിത്ത് പറയുന്നത്.
പ്രകോപിതനായ കണ്ടക്ടര്‍ മുഖത്തടിക്കുകയും നെഞ്ചത്ത് കടിക്കുകയുമായിരുന്നുവെന്ന് വിദ്യാര്‍ഥി പറഞ്ഞു. സംഭവത്തിനു പിന്നാലെ കൃഷ്ണജിത്ത് ബന്ധുക്കള്‍ക്കൊപ്പമെത്തി തൃക്കാക്കര പോലീസിലും ബാലാവകാശ കമ്മിഷനും മോട്ടോര്‍ വാഹന വകുപ്പിനും പരാതി നല്‍കി.
