തൊടുപുഴ: കസ്തൂരിരംഗന്‍ റിപ്പോര്‍ട്ടിന്റെ അടിസ്ഥാനത്തില്‍ ESA പാരിസ്ഥിതിക ലോല മേഖല നിര്‍ണ്ണയിക്കുന്നതില്‍ ജനവാസ മേഖലകളെ ഒഴിവാക്കി അന്തിമ വിജ്ഞാപനം പുറപ്പെടുവിക്കണമെന്ന് ഡീന്‍ കുര്യാക്കോസ് എം.പി. ലോക്‌സഭയില്‍ ആവശ്യപ്പെട്ടു. അനാവശ്യമായി സമയം ദീര്‍ഘിപ്പിച്ചാല്‍ ബഫര്‍ സോണ്‍ വിഷയത്തില്‍ സുപ്രീം കോടതിയില്‍ നിന്നും തിരിച്ചടിയുണ്ടായതുപോലെ പ്രശ്‌നങ്ങള്‍ ഉണ്ടായേക്കാം. നിലവില്‍ 2014 ല്‍ ഒന്നാമത്തെ കരട് വിജ്ഞാപനം വന്നതിന് ശേഷം, തുടരെ 4 കരട് വിജ്ഞാപനങ്ങള്‍ പുറത്തിറക്കി.
നിലവില്‍ 9993. 7 ച.കി.മീ ആണ് നിലവില്‍ കേരളത്തിന്റെ ഇ.എസ്.എ ഭൂപരിധി ജനവാസ കേന്ദ്രങ്ങളെയും, കൃഷിസ്ഥലങ്ങളെയും പൂര്‍ണമായും ഒഴിവാക്കിയാണ് ഈ ഇ.എസ്.എ പ്രഖ്യാപിച്ചിട്ടുള്ളത്. സംസ്ഥാന സര്‍ക്കാര്‍ വീണ്ടും കുറച്ച് കൂടി ഇ.എസ്.എ ഒഴിവാക്കണമെന്ന് ആവശ്യപ്പെട്ടിട്ടുണ്ട്. കൂടുതല്‍ സമയം ദീര്‍ഘിപ്പിച്ചാല്‍ ബഫര്‍ സോണ്‍ വിഷയത്തില്‍ സുപ്രീം കോടതി ഇടപെട്ടതുപോലെ ഈക്കാര്യത്തിലുമുണ്ടായാല്‍ ജനജീവിതം ദുസ്സഹമാക്കും.
നിലവില്‍ അന്തിമ വിജ്ഞാപനമിറക്കുന്നതിനായി പ്രത്യേക കമ്മറ്റിയെ നിയോഗിച്ചിട്ടുണ്ട്. പ്രസ്തുത കമ്മറ്റിയുടെ നേതൃത്വത്തില്‍ എത്രയും പെട്ടെന്ന് ജനവാസ കേന്ദ്രങ്ങളെയും, കൃഷിസ്ഥലങ്ങളെയും ഒഴിവാക്കി അന്തിമ വിജ്ഞാപനമിറക്കണമെന്ന് എം.പി. ആവശ്യപ്പെട്ടു.
ബഫര്‍ സോണ്‍ വിഷയത്തില്‍, ജനവാസ കേന്ദ്രങ്ങളെ ഉള്‍ക്കൊള്ളിച്ച് സംസ്ഥാന സര്‍ക്കാര്‍ സാറ്റലൈറ്റ് സര്‍വ്വേ പൂര്‍ത്തീകരിച്ചത് പ്രതിക്ഷേധകരമാണ്. ഫിസിക്കല്‍ വേരിഫിക്കേഷന്‍ നടത്തി, ബഫര്‍ സോണില്‍ ഉള്‍പ്പെട്ട ജനവാസ കേന്ദ്രങ്ങളെ ഒഴിവാക്കണം. ഇടുക്കിയില്‍ വിവിധ മേഖലകളിലായി, 20 ലധികം വില്ലേജുകള്‍ ഈ ഗണത്തില്‍ ഉള്‍പ്പെട്ടിരിക്കുന്നത് ഒഴിവാക്കണമെന്നും ഡീന്‍ കുര്യാക്കോസ് എം.പി. ആവശ്യപ്പെട്ടു.
ഈ വിഷയം ചൂണ്ടികാണിച്ചും, മതികെട്ടാന്‍ ചോലയില്‍ അന്തിമ വിജ്ഞാപനം പ്രഖ്യാപിച്ചിരിക്കുന്നത് റദ്ദു ചെയ്യണമെന്ന് ആവശ്യപെട്ടും മന്ത്രി ഭുവേന്ദ്ര യാദവിനെ നേരില്‍ കണ്ടു. ഇക്കാര്യങ്ങള്‍ അനുഭാവ പൂര്‍ണ്ണം പരിഗണിക്കാമെന്നും ഇ.എസ്.എ പ്രദേശവുമായി ബന്ധപ്പെട്ട് അന്തിമ വിജ്ഞാപനം പുറപ്പെടുവിക്കാന്‍ നടപടികള്‍ വേഗത്തിലാക്കുമെന്നും മന്ത്രി ഉറപ്പു നല്‍കി.
