മൂവാറ്റുപുഴ: കാലം തെറ്റിയെത്തിയ കാലവര്‍ഷത്തെ തുടര്‍ന്ന് മൂവാറ്റുപുഴ നിയോജക മണ്ഡലത്തില്‍ തകര്‍ന്ന റോഡുകള്‍ നവീകരിക്കണമെന്ന് മുന്‍ എംഎല്‍എ എല്‍ദോ എബ്രഹാം ആവശ്യപ്പെട്ടു. മണ്ഡലത്തിലെ പ്രധാന പാതകളില്‍ റോഡുകള്‍ മഴയെ തുടര്‍ന്ന് തകര്‍ന്നു. മൂവാറ്റുപുഴ – തൃക്കളത്തൂര്‍ എം.സി റോഡിന്റെ ബി.സി. ഓവര്‍ലേ പലയിടങ്ങളിലും പോയി റോഡില്‍ ഗര്‍ത്തം രൂപപ്പെട്ടു. നാഷണല്‍ ഹൈവേ കക്കടാശ്ശേരി മുതല്‍ മൂവാറ്റുപുഴ നഗരം വരെ തകര്‍ന്നു. വാഴക്കുളം – കല്ലൂര്‍ക്കാട് റോഡും, പൈങ്ങോട്ടുര്‍- കലൂര്‍ റോഡും, വാഴക്കുളം- കാവന റോഡുകളും സഞ്ചാര യോഗ്യമല്ലാതായിരിക്കുകയാണ്.
നിയോജക മണ്ഡലത്തില്‍ ഗതാഗത യോഗ്യമല്ലാതായ പൊതുമരാമത്ത് റോഡുകളും ഗ്രാമീണ റോഡുകളുടെയും അറ്റകുറ്റപ്പണികള്‍ നടത്തുന്നതിന് അടിയന്തര സഹായം ലഭ്യമാക്കണമെന്നും റീബില്‍ഡ് കേരള, 2020-2021 ബജറ്റ്, പൊതുമരാമത്ത് വകുപ്പ് അനുവദിച്ച റോഡുകളുടെ ഫണ്ട്, കേന്ദ്ര റോഡ് ഫണ്ട് ഉള്‍പ്പെടെ കഴിഞ്ഞ സര്‍ക്കാരിന്റെ കാലത്ത് ഭരണാനുമതി ലഭിച്ച പ്രവര്‍ത്തികള്‍ വേഗതയില്‍ നടപ്പാക്കണമെന്നും എല്‍ദോ എബ്രഹാം സര്‍ക്കാരിനോടാവശ്യപ്പെട്ടു.
റീ ബില്‍ഡ് കേരള പദ്ധതിയില്‍ ഫണ്ട് അനുവദിച്ച കടാതി- കടക്കനാട് റോഡ് 2.25 കോടി, കീച്ചേരിപ്പടി -ആട്ടായം – കുറ്റിക്കാട്ടു ചാലില്‍പ്പടി റോഡ് 3.50 കോടി, ഇഇസി മാര്‍ക്കറ്റ് റോഡ് 1.25 കോടി, സംസ്ഥാന ബജറ്റില്‍ ഫണ്ട് അനുവദിച്ച വടക്കന്‍ പാലക്കുഴ- മൂങ്ങാംകുന്ന് റോഡ് 2.50 കോടി, മുള്ളരിങ്ങാട് – ചാത്തമറ്റം റോഡ് 8 കോടി, പൊതുമരാമത്ത് വകുപ്പില്‍ നിന്നും ഫണ്ട് അനുവദിച്ച വാളകം -മണ്ണൂര്‍ റോഡ് 250 ലക്ഷം, ആരക്കുഴ- തോട്ടക്കര റോഡ് 225 ലക്ഷം, കല്ലൂര്‍ക്കാട് ടൗണ്‍ റോഡ്- 1 കോടി, കല്ലൂര്‍ക്കാട് കുമാരമംഗലം റോഡ് 2 കോടി, വാച്ച് സ്റ്റേഷന്‍- ഏനനെല്ലൂര്‍ റോഡ് 3 കോടി, ആരക്കുഴ ഗവ.ഐ.റ്റി. ഐ. റോഡ് 4 കോടി, മൂവാറ്റുപുഴ – പിറവം റോഡ് നവീകരണം 2 കോടി, കേന്ദ്ര റോഡ് ഫണ്ട് അനുവദിച്ച മൂവാറ്റുപുഴ – കൂത്താട്ടുകുളം ലിങ്ക് റോഡ് 16 കോടി എന്നീ വര്‍ക്കുകളുടെ നടപടികള്‍ വേഗതയിലാക്കണമെന്ന് അദ്ദേഹം ആവശ്യപ്പെട്ടു.
നിയോജക മണ്ഡലത്തിലെ ചെറുതും വലുതുമായ റോഡുകള്‍ ഏറെയും കാലവര്‍ഷത്തെ തുടര്‍ന്ന് തകര്‍ന്നിരിക്കുകയാണ്. ഈ റോഡുകളിലെ യാത്ര ക്ലേശം പരിഹരിക്കാന്‍ മണ്ഡലത്തിലെ പൊതുമരാമത്ത് റോഡുകളുടെ ആകെ ദൈര്‍ഘ്യത്തിന് ആനുപാതികമായി അറ്റകുറ്റപ്പണികള്‍ക്ക് അടിയന്തിരമായി പണം അനുവദിക്കണമെന്നും എല്‍ദോ എബ്രഹാം ആവശ്യപ്പെട്ടു.
•നെല്‍സണ്‍ പനയ്ക്കല്‍
