കാക്കനാട്: എറണാകുളം ജില്ലാ പഞ്ചായത്ത് 2023 – 24 വാര്‍ഷിക പദ്ധതി രൂപീകരണത്തിന്റെ ഭാഗമായി ഗ്രാമസഭാ യോഗം റോജി എം. ജോണ്‍ എം.എല്‍.എ ഉദ്ഘാടനം ചെയ്തു. തദ്ദേശ സ്ഥാപനങ്ങളെ കൂടുതല്‍ ശക്തിപ്പെടുത്തി മുന്നോട്ട് പോകേണ്ടത് നാടിന്റെ ആവശ്യമാണെന്ന് എം.എല്‍.എ പറഞ്ഞു. നൂതനമായതും കാലഘട്ടത്തിന് അനുസരിച്ച് സാധാരണക്കാരുടെ ആവശ്യങ്ങള്‍ കണ്ടറിഞ്ഞാണ് ജില്ലാ പഞ്ചായത്ത് പദ്ധതികള്‍ ആവിഷ്‌കരിച്ച് നടപ്പിലാക്കി വരുന്നതെന്നും അദ്ദേഹം പറഞ്ഞു.
ജില്ലാപഞ്ചായത്ത് പ്രിയദര്‍ശിനി ഹാളില്‍ നടന്ന യോഗത്തില്‍ ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ് അധ്യക്ഷത വഹിച്ചു. വര്‍ക്കിംഗ് ഗ്രൂപ്പ് യോഗത്തിലെ നിര്‍ദ്ദേശങ്ങള്‍ ഗ്രാമ സഭയില്‍ ചര്‍ച്ച ചെയ്ത് എടുക്കുന്ന തീരുമാനങ്ങള്‍ അടിസ്ഥാനമാക്കി ജനുവരി 16 ന് വികസന സെമിനാര്‍ സംഘടിപ്പിക്കുമെന്ന് അദ്ദേഹം പറഞ്ഞു. വര്‍ക്കിംഗ് ഗ്രൂപ്പ് കരട് പദ്ധതി നിര്‍ദ്ദേശങ്ങള്‍ ആസൂത്രണ സമിതി വൈസ് ചെയര്‍മാന്‍ കെ.കെ അബ്ദുല്‍ റഷീദ് അവതരിപ്പിച്ചു.
യോഗത്തില്‍ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍മാരായ റാണിക്കുട്ടി ജോര്‍ജ്, ആശാ സനില്‍, എം.ജെ ജോമി, ജില്ലാ പഞ്ചായത്ത് അംഗങ്ങള്‍, ബ്ലോക്ക് – ഗ്രാമ പഞ്ചായത്ത് പ്രസിഡന്റ്മാര്‍, സ്റ്റാന്‍ഡിംഗ് കമ്മിറ്റി ചെയര്‍മാന്‍മാര്‍, ജില്ലാ പഞ്ചായത്ത് സെക്രട്ടറി ജോബി തോമസ് തുടങ്ങിയവര്‍ പങ്കെടുത്തു.
