വ്യത്യസ്തമായ ഭൂപ്രകൃതിയാണ് രക്ഷാപ്രവര്‍ത്തനത്തിന് വെല്ലുവിളിയായി തുടരുന്നത്. ഹെലികോപ്ടറിന് ഇറങ്ങാനോ ഡ്രോണ്‍ ഉപയോഗിച്ച് ഭക്ഷണം എത്തിക്കാനോ സാധിക്കാത്തതിന് കാരണവും ഇതു തന്നെയാണ്. ശക്തമായ കാറ്റ് വീശുന്നതിനാല്‍ ഹെലികോപ്ടര്‍ നിയന്ത്രിച്ച് നിര്‍ത്താന്‍ കഴിയാത്തതും വെല്ലുവിളിയായി.
വളരെ ഉയരം കൂടിയ മേഖലയിയായ ചെറാട് മലയിലേയ്ക്ക് ട്രക്കിംഗ് അനുവദനീയമല്ലെന്നാണ് വിവരം. വന്യജീവികളുടെ വിഹാര കേന്ദ്രമാണിവിടമെന്ന് നാട്ടുകാര്‍ പറയുന്നു. ചെങ്കുത്തായ മലനിരകളില്‍ കൂടി വളരെ പ്രയാസപ്പെട്ട് വേണം മുകളിലേയ്ക്ക് എത്താനെന്ന് സിവില്‍ ഡിഫന്‍സ് ചീഫ് വാര്‍ഡന്‍ ഷിഹാബുദ്ദീന്‍ പറഞ്ഞു.
സാധാരണക്കാര്‍ക്ക് മുകളിലെത്താന്‍ ഏറെ ബുദ്ധിമുട്ടുള്ള പ്രദേശമായതിനാല്‍ ജീവന്‍ പണയം വെച്ച് റോപ്പ് ഉപയോഗിച്ചാണ് ശ്രമം തുടരുന്നതെന്ന് ദൗത്യസംഘത്തിലുള്ളവര്‍ പറഞ്ഞു. പകല്‍ സമയം കനത്ത ചൂടും രാത്രി തണുപ്പേറിയ കാലാവസ്ഥയുമാണ് അനുഭവപ്പെടുന്നത് എന്നതിനാല്‍ കാലാവസ്ഥയിലുള്ള മാറ്റം രക്ഷാപ്രവര്‍ത്തനത്തിനും ബാബുവിനും ഒരുപോലെ വെല്ലുവിളിയാകുന്നുണ്ട്.
ചൊറാട് മലയുടെ പടിഞ്ഞാറ് ഭാഗത്തായാണ് ബാബു കുടുങ്ങിയതെന്ന് നാട്ടുകാര്‍ പറഞ്ഞു. ചെങ്കുത്തായ ഭാഗമായതിനാല്‍ തന്നെ വടം ഉപയോഗിച്ചുള്ള രക്ഷാപ്രവര്‍ത്തനവും സാധ്യമായില്ല. ബാബുവിനെ രക്ഷിക്കാനുള്ള ശ്രമങ്ങള്‍ ഓരോന്നായി പരാജയപ്പെടുന്ന സാഹചര്യമാണുള്ളത്. മലയുടെ അടിവാരത്ത് നിരവധിയാളുകളാണ് ബാബുവിനായി കാത്തിരിക്കുന്നത്.
തിങ്കളാഴ്ച ഉച്ചയോടെയാണ് സംഭവമുണ്ടായത്. ബാബുവും മറ്റ് രണ്ട് കുട്ടികളും ചേര്‍ന്നാണ് ചെറാട് മലയുടെ ചെങ്കുത്തായ കുറുമ്പാച്ചി മല കയറിയത്. എന്നാല്‍ രണ്ട് പേരും പകുതി വഴിയില്‍ തിരികെ പോയി. പക്ഷേ, പിന്മാറാന്‍ തയ്യാറാകിതരുന്ന ബാബു മല മുകളിലേയ്ക്ക് പോവുകയായിരുന്നു.
മുകളില്‍ നിന്ന് കാല്‍ തെന്നിവീണ ബാബു പാറക്കെട്ടിനിടയില്‍ കുടുങ്ങുകയായിരുന്നു. ബാബു തന്നെയാണ് അഗ്‌നിശമന സേനാംഗങ്ങളെ വിളിച്ച് മലയില്‍ കുടുങ്ങിയ കാര്യം അറിയിച്ചത്.
