തിരുവനന്തപുരം: വിവാഹം കഴിഞ്ഞ് ആറ് മാസമാകുന്നതിന് മുന്‍പ് ഭാര്യയെ തലയ്ക്കടിച്ചു കൊലപ്പെടുത്തിയ കേസിലെ പ്രതി കൊല്ലം ഡോക്ടര്‍മുക്ക് സ്വദേശി അനിയെ കോടതി ജീവപര്യന്തം കഠിന തടവിനും മുപ്പതിനായിരം രൂപ പിഴയ്ക്കും ശിക്ഷിച്ചു. പിഴ ഒടുക്കിയില്ലെങ്കില്‍ ആറുമാസം അധിക തടവ് അനുഭവിയ്ക്കണം. നാവായിക്കുളം മാവിന്‍മൂട് സ്വദേശി മഞ്ചുവിനെ കൊലപ്പെടുത്തിയ കേസിലാണ് രണ്ടാം അഡിഷണല്‍ ജില്ലാ സെഷന്‍സ് ജഡ്ജി റോയ് വര്‍ഗ്ഗീസിന്റെ വിധി.
വിവാഹം കഴി‌ഞ്ഞ നാള്‍ മുതല്‍ അനി ചാരിത്ര്യത്തില്‍ സംശയം പ്രകടിപ്പിച്ച്‌ മഞ്ചുവിനെ മര്‍ദ്ദിക്കുമായിരുന്നു. മര്‍ദ്ദനം സഹിയ്ക്ക വയ്യാതെ സഹോദരി സുമയുടെ വീട്ടിലേക്ക് താമസം മാറിയ മഞ്ചുവിനെ സുമയുടെ വീട്ടില്‍ വച്ചാണ് അനി കോടാലി കൊണ്ട് തലയ്ക്കടിച്ച്‌ കൊലപ്പെടുത്തിയത്. സുമയുടെ വീട്ടില്‍ ആരും ഇല്ലാതിരുന്ന സമയത്തായിരുന്നു സംഭവം. അനി വീട്ടില്‍ വന്നിട്ട് ഉടന്‍ മടങ്ങിപ്പോകുന്നത് അയല്‍വാസിയായ ബാലിക കണ്ടിരുന്നു. പെണ്‍കുട്ടി സുമയുടെ വീട്ടില്‍ ചെന്നപ്പോഴാണ് മഞ്ചു രക്തത്തില്‍ കുളിച്ച്‌ കിടക്കുന്നത് കണ്ടത്. ദൃക് സാക്ഷികള്‍ ഇല്ലാതിരുന്ന കേസില്‍ സാഹചര്യ, ശാസ്ത്രീയ തെളിവുകളാണ് പ്രോസിക്യൂഷന് സഹായകമായത്. കേസില്‍ 16 സാക്ഷികളെ പ്രോസിക്യൂഷന് വിസ്തരിച്ചു.
