ഗൂഗിള്‍ മാപ്പ് നോക്കി യാത്ര ചെയ്ത സംഘത്തിന്റെ കാര്‍ പാലത്തില്‍ നിന്നും പുഴയിലേക്ക് മറിഞ്ഞു. കാസര്‍കോട് ജില്ലയിലെ പള്ളഞ്ചി – പാണ്ടി റോഡില്‍ പള്ളഞ്ചി ഫോറസ്റ്റിലുള്ള കൈവരി ഇല്ലാത്ത പാലത്തില്‍ നിന്നാണ് കാര്‍ പുഴയിലേക്ക് വീണത്. കാറിൽ ഉണ്ടായിരുന്ന റാഷിദ്, തസ്രീഫ് എന്നിവരെ ഫയർഫോഴ്‌സ് രക്ഷപ്പെടുത്തി. കാഞ്ഞങ്ങാട് നിന്ന് പുത്തൂരിലേക്ക് പോവുകയായിരുന്നു ഇവർ. ഗൂഗിൾ മാപ്പ് നോക്കിയായിരുന്നു യാത്ര.
പാലത്തിൻ്റെ ഉപരിതലത്തിൽ വെള്ളം കെട്ടിക്കിടക്കുന്നതിനാൽ പാലത്തിൻ്റെ സ്ഥാനം കണ്ടെത്താനായിട്ടില്ല. മറിഞ്ഞ കാറിൽ നിന്ന് ഇറങ്ങിയ ഇരുവരും നദിയിൽ ഒഴുക്കിൽപ്പെടുകയായിരുന്നു. മരത്തിൽ പിടിച്ച് നിൽക്കുകയായിരുന്ന ഇവരെ അഗ്നിശമന സേനാംഗങ്ങൾ രക്ഷപ്പെടുത്തി. ഗുരുതരമായി പരിക്കേറ്റ യാത്രക്കാരെ ആശുപത്രിയിൽ പ്രവേശിപ്പിച്ചു.
