കുന്നംകുളം വൈശേരിയില്‍ യുവാവിനെ ബൈക്ക് ഇടിച്ച് വീഴ്ത്തി കൊലപ്പെടുത്താന്‍ ശ്രമിച്ച സംഭവത്തില്‍ മൂന്നുപേരെ കുന്നംകുളം പൊലീസ് അറസ്റ്റ് ചെയ്തു. ചിറളയം സ്വദേശികളായ ചെറുശേരി വീട്ടിൽ ഷൈൻ കെ ജോസ്, പാറമേൽ വീട്ടിൽ ലിയോ പി വർഗീസ്, ചിറയത്ത് വീട്ടിൽ അജിത്ത് എന്നിവരെയാണ് കുന്നംകുളം പൊലീസ് അറസ്റ്റ് ചെയ്തത്. കുന്നംകുളം സ്വദേശി പുലിപ്പറമ്പിൽ വീട്ടിൽ വൈശേരി ജിനിഷിനെ (25)യാണ് സൈക്കിളിലെത്തിയ സംഘം കൊലപ്പെടുത്താൻ ശ്രമിച്ചത്.
കഴിഞ്ഞ മാർച്ച് 20ന് ചിറളയം ശ്രീരാമസ്വാമി ക്ഷേത്രോത്സവത്തിനിടെയാണ് സംഘർഷമുണ്ടായത്. ഈ സംഘര്‍ഷത്തിന്റെ തുടര്‍ച്ചയെന്നോണമാണ് യുവാവിനു നേരേ ആക്രമണം ഉണ്ടായതെന്നാണ് പരാതി. ഉത്സവത്തിനിടയില്‍ ചിറളയം സ്വദേശി ഷൈന്‍ സി ജോസ് ഉള്‍പ്പെടെ അഞ്ചുപേരെ ആക്രമിച്ച കേസിലെ പ്രതിയാണ് മര്‍ദനമേറ്റ ജിനീഷ്. കേസുമായി ബന്ധപ്പെട്ട് പൊലീസ് സ്റ്റേഷനില്‍ ഒപ്പിട്ടതിനുശേഷം മടങ്ങി വരുന്നതിനിടെയായിരുന്നു ആക്രമണം നടന്നത്.
