തിരുവനന്തപുരം: ചെന്നൈയിലെ രൂക്ഷമായ ജലക്ഷാമത്തിന് പിന്നാലെ കേരളത്തിന് മുന്നറിയിപ്പുമായി വിദഗ്ധര്‍. മഴയുടെ അളവു കുറയുന്നതും മണ്ണിന്റെ ജലസംഭരണശേഷി കുറയുന്നതും കേരളത്തിന് തിരിച്ചടിയാകുമെന്നാണ് മുന്നറിയിപ്പ്. വര്‍ഷത്തില്‍ 10 മാസവും മഴ ലഭിച്ചിരുന്ന കേരളത്തില്‍ കഴിഞ്ഞ വര്‍ഷം ലഭിച്ച മഴയുടെ അളവ് വളരെ കുറവാണ്. ഓഗസ്റ്റിലെ പ്രളയത്തിന് ശേഷം സെപ്റ്റംബറില്‍ ചെറിയ രീതിയില്‍ പോലും മഴ പെയ്‌തിരുന്നില്ല. മാര്‍ച്ച്‌ മുതല്‍ മേയ് വരെയുള്ള വേനല്‍മഴ ശരാശരിയില്‍ നിന്ന് 55 ശതമാനം കുറഞ്ഞു. കേരളത്തിലെ മഴദിനങ്ങളുടെ ശരാശരി 110 ആയിരുന്നു. സമീപകാലത്ത് അത് 85 മുതല്‍ 90 വരെയായി കുറഞ്ഞു.
തമിഴ്നാട്ടില്‍ വാര്‍ഷികമഴയുടെ ശരാശരി അളവ് 1500 മില്ലിമീറ്ററാണ്. കേരളത്തിന്റെ നേര്‍പകുതിയാണിത്. കേരളത്തിന്റെ ഇരട്ടിയിലേറെ ജനസംഖ്യയുണ്ടായിട്ടും വരള്‍ച്ചയെ അവര്‍ അതിജീവിക്കുന്നത് കര്‍ശനമായ ജലസംരക്ഷണത്തിലൂടെയാണ്. എന്നാല്‍ കേരളം അങ്ങനെയല്ല. ലോകാരോഗ്യസംഘടനയുടെ കണക്കുപ്രകാരം ഒരു ദിവസം ഒരാള്‍ക്ക് ആവശ്യമായ വെള്ളത്തിന്റെ അളവ് 135 ലീറ്റര്‍ ആണ്. അതേസമയം കേരളത്തിലെ ഒരാള്‍ ഒരു ദിവസം ഉപയോഗിക്കുന്നത് 400 ലീറ്റര്‍ വെള്ളമാണ്.
