തിരുവനന്തപുരം: കേന്ദ്ര സര്ക്കാര് തീരുമാനം വരുന്നത് വരെ 12 വയസില് താഴെയുള്ള ഒരു കുട്ടിയുമായി ഇരുചക്ര വാഹനത്തില് യാത്ര ചെയ്താല് പിഴ ഈടാക്കില്ലെന്ന് ഗതാഗത വകുപ്പ് മന്ത്രി ആന്റണി രാജു പറഞ്ഞു. ഇക്കാര്യത്തില് ഭേദഗതി ആവശ്യമാണെന്ന് ചൂണ്ടിക്കാട്ടി കേന്ദ്രത്തിന് കത്തയച്ചിട്ടുണ്ട്. പൊതുവികാരം കണക്കിലെടുത്താണ് തീരുമാനമെന്നും മന്ത്രി അറിയിച്ചു.
സംസ്ഥാനത്ത് എ.ഐ ക്യാമറകള് കണ്ടെത്തുന്ന നിയമലംഘനങ്ങളില് ജൂണ് അഞ്ചാം തീയതി മുതല് പിഴ ഈടാക്കുമെന്ന് മന്ത്രി പറഞ്ഞു. നേരത്തെ മേയ് 20 മുതല് പിഴയീടാക്കുമെന്നറിയിച്ചിരുന്നെങ്കിലും ഇത് വീണ്ടും നീട്ടുകയായിരുന്നു. ഗതാഗതമന്ത്രി വിളിച്ച ഉന്നത തല യോഗത്തിലാണ് തീരുമാനം.
നിയമലംഘനങ്ങള് ചൂണ്ടിക്കാട്ടി മേയ് അഞ്ച് മുതലാണ് മോട്ടോര് വാഹന വകുപ്പ് ബോധവത്കരണ നോട്ടിസ് അയച്ച് തുടങ്ങിയത്. ജൂണ് നാലുവരെമാത്രമേ ഇതുണ്ടാകൂ. ഇതിനുശേഷം പിഴനോട്ടീസ് അയച്ചുതുടങ്ങും. ഉദ്യോഗസ്ഥതലത്തില് പ്രാഥമിക പരിശോധന നടത്തിയശേഷമാകും പിഴ ചുമത്തുക.
ആകെ 726 ക്യാമറകളില് 675 എണ്ണം ഹെല്മെറ്റ്, സീറ്റ് ബെല്റ്റ് തുടങ്ങിയ നിയമലംഘനങ്ങള് കണ്ടെത്താനായാണ് സ്ഥാപിച്ചിരിക്കുന്നത്. ഏറ്റവും കൂടുതല് നിയമലംഘനങ്ങളും ഈ വിഭാഗത്തിലാണ് വരുന്നത്. അനധികൃത പാര്ക്കിങ് കണ്ടെത്താന് 25 ക്യാമറകളുണ്ട്. അമിത വേഗം തിരിച്ചറിയുന്ന നാല് ക്യാമറകളും ലൈന് തെറ്റിക്കല്, ട്രാഫിക് സിഗ്നല് തെറ്റിക്കല് എന്നിവ കണ്ടെത്താന് 18 ക്യാമറകളുമാണ് നിലവിലുള്ളത്. നിരീക്ഷണം, തെളിവ് ശേഖരിക്കല് എന്നിവയാണ് എഐ ക്യാമറകളുടെ ദൗത്യങ്ങള്.
നിയമലംഘനം ക്യാമറ പിടികൂടിയാല് ഉടന് വാഹന ഉടമയുടെ മൊബൈലേക്ക് പിഴയടക്കാനുള്ള സന്ദേശമെത്തും. ഒരാഴ്ചക്കുള്ളില് പോസ്റ്റിലൂടെ ഇ- ചെല്ലാനുമെത്തും. 30 ദിവസത്തിനുളളില് പിഴ അടച്ചില്ലെങ്കില് മോട്ടോര് വാഹനവകുപ്പ് നോട്ടീസച്ച് തുടര് നടപടികളിലേക്ക് കടക്കും.