കഴിഞ്ഞ ദിവസം വാങ്ങിയ ഒരു കിലോ കേരമത്സ്യത്തില്‍ പല്ലിയെ കണ്ടെന്നാരോപിച്ച് വാക്ക് തര്‍ക്കം ഉണ്ടായിരുന്നു. വാക് തര്‍ക്കം ആക്രമണത്തില്‍ കലാശിച്ചിരുന്നു. തുടര്‍ന്ന് യൂത്ത് കോണ്‍ഗ്രസ് വ്യാപാരസ്ഥാപനത്തില്‍ കയറി ജീവനക്കാരനെ ആക്രമിക്കുകയായിരുന്നു.
മൂന്നാറിലെ മൊത്ത മത്സ്യവില്‍പ്പനശാലയിലെ ജീവനക്കാരനായ അഖിലിനാണ് മര്‍ദ്ദനമേറ്റത്. പരിക്കേറ്റ ഇയാളെ മൂന്നാര്‍ ജനറല്‍ ആശുപത്രിയില്‍ പ്രവേശിപ്പിച്ചു. ശനിയാഴ്ച വൈകുന്നേരത്തോടെയായിരുന്നു സംഭവം. ശനിയാഴ്ച രാവിലെ വിറ്റ മത്സ്യത്തില്‍ നിന്നാണ് പല്ലിയെ കിട്ടിയതെന്ന് ആരോപണം. മൂന്നാര്‍ മണ്ഡലം യൂത്ത് കോണ്‍ഗ്രസ് പ്രസിഡന്റിന്റെ നേത്യത്വത്തിലായിരുന്നു ആക്രണം നടത്തിയത്. മീന്‍ വാങ്ങിയ വ്യക്തിയെ ചോദിച്ചെങ്കിലും അയാള്‍ എത്തിയില്ലെന്ന് പറഞ്ഞ സംഘം കടയടക്കാന്‍ ശ്രമിച്ചതോടെയാണ് സംഭവത്തിന്റെ തുടക്കം. അഖിലിന്റെ നെഞ്ചിനും മൂക്കിനും പരിക്കേറ്റു.
എന്നാല്‍, കാര്യങ്ങള്‍ ചോദിക്കുക മാത്രമാണ് ചെയ്തതെന്നും ഇതിനുമുമ്പും ചീഞ്ഞ മീനുകള്‍ ഈ സ്ഥാപനത്തില്‍ നിന്നും വില്‍ക്കുന്നതായി ആരോപണമുണ്ടായിട്ടുണ്ടെന്നും യൂത്ത് കോണ്‍ഗ്രസ് പ്രവര്‍ത്തകര്‍ പറയുന്നു. സംഭവത്തില്‍ പോലീസിനും ആരോഗ്യവകുപ്പിനും പരാതി നല്‍കിയിട്ടുണ്ടെന്നും ഇവര്‍ പറഞ്ഞു. രണ്ടുപേരുടെയും പരാതിയില്‍ മൂന്നാര്‍ പോലീസ് കേസെടുത്ത് അന്വേഷണം ആരംഭിച്ചു.
